تورا میدیا سى ئێن ئێن یا ئه‌مریكى ئاشكرا كر ، به‌رپرسێن وه‌زاره‌تا به‌ره‌ڤانیا ئه‌مریكا پنتاگون سه‌باره‌ت مه‌ترسیا هێرشێن پێشبینیكرى یێن ئیرانێ و هه‌ڤپه‌یمانێن وێ ل بیره‌وه‌ریا كوشتنا قاسم سوله‌یمانى فه‌رماندێ فه‌یله‌قا قودس یێ سوپایێ پاسده‌ران ل ئیران ب سه‌ر دووئاراستێن جودا دا به‌لاڤبووینه
راپورتا سی ئێن ئێن ل سه‌ر ده‌ڤێ به‌رپرسه‌كێ بلند یێ پنتاگونێ ڤه‌گوهاستیه ، ل ده‌مێ سوله‌یمان كوشتى هه‌تا نوكه مه‌ترسێن تولڤه‌كرنێ یێن ئیرانێ گه‌هشتیه بلندترین ئاست
ژماره‌كا به‌رپرسێن دى ل پنتاگونێ ئاماژه ب وێ چه‌ندێ كر لدویڤ چه‌ند پێزانینێن هه‌والگێریا نوى كو ب ده‌ستێ وان كه‌فتى ، ئیران و گروپێن هه‌ڤپه‌یمانێن وێ ل عێراقێ پلان بو ئه‌نجامدانا زنجیره‌كا هێرشان بو سه‌ر هێزێن ئه‌مریكى ل روژهه‌لاتا ناڤه‌راست داناینه و دڤى چارچوڤى دا ژى ته‌هران ژماره‌كا زور یا موشه‌كێن كورت مه‌ودا ڤه‌گوهاستینه دناڤ ئاخا عێراقێ دا ، ئه‌ڤه ژى وه‌كریه كو دبه‌رامبه‌ر دا هێزێن زێده‌تر ره‌وانه‌ى ده‌ڤه‌رێ بكه‌ت
به‌رپرسه‌كێ دى ل وه‌زاره‌تا به‌ره‌ڤانیا ئه‌مریكا دوپاتكریه ، مارك میلى سه‌روك ئه‌ركانێ هه‌ڤپشك یێ له‌شكرێ ئه‌مریكا ب رژدى چاڤدێریا ره‌وشێ دكه‌ت و رونكریه پسپورێن سه‌ربازى د وێ باوه‌ریێ دا نینن كو چ مه‌ترسیێن هێرشكرنێ هه‌بیت ، به‌لێ بو هه‌ر هێرشه‌كا ته‌هران و پارێزگه‌رى كرن ل هێزێن ئه‌مریكى ل ده‌ڤه‌رێ هێزێن مه د ئاماده‌باشیێ دانه
هه‌روه‌سا گوت هه‌ر ژ چارچوڤێ وان ئاماده‌كاریێن شه‌ڤا بورى كینیت ماكێنزى فه‌رماندێ فه‌رمانده‌یا ناڤه‌ندى یا هێزێن ئه‌مریكى گه‌هشتنا دوو فروكێن ژ جورێ بى 52 بو روژ هه‌لاتا ناڤه‌راست راگه‌هاند
