نێچیرڤان بارزانى سه‌روكێ هه‌رێما كوردستانێ ب هه‌لكه‌فتا جه‌ژنا نه‌وروزێ په‌یامه‌ك به‌لاڤكر ئه‌ڤه ژى ده‌قێ وێ یه:
كوردستانیێن خوشتڤى
جه‌ژنا نه‌ورزێ و سه‌رێ سالا نوى یا كوردى ل خێزان و كه‌س و كارێن سه‌ربلندێن شه‌هیدان و ئه‌نفالكریان و گه‌لێ كورد و هه‌مى كوردستانیان یێن ل وه‌لاتى و ژده‌رڤه و ل هه‌ر جهه‌كێ بن و ل پێشمه‌رگێن قه‌هره‌مان و هێزێن ئه‌منى ب گه‌رمى و ژدل پیروز دكه‌م، و ل هه‌مى وان گه‌ل و وه‌لاتان ژى پیروز بیت كو جه‌ژنا نه‌وروزێ دگێرن و هه‌مى ساله‌ك ب خوشى بیت.
پیروزباهیێن تایبه‌ت، سوپاسیا هه‌مى تیمێن نوشدارى و ساخله‌میێ و هه‌مى وان لایه‌نێن په‌یوه‌ندیدار دكه‌م كو بو سالا دووێ یه د پێشىێ دانه بو به‌رهنگاربوونا كورونایێ و گیان و سلامه‌تیا وه‌لاتیان دپارێزن، ئه‌و خزمه‌ته‌كا مه‌زن دكه‌ن ده‌ستخوشیێ ل ماندینه‌بوونا وان دكه‌م.
ب رێز ڤه بیریا هه‌ڤالێن وان دكه‌ین كو گیانێ خو كریه قوربان، هه‌روه‌سا بیریا وان هه‌میان دكه‌ین كو ب ڤایروسێ كورورنایێ گیانێ خو ژده‌ستداى، هه‌ڤخه‌مێ خێزان و كه‌س وكارێن وانم، هیڤیا سلامه‌تیێ و زوى چێبوونێ بو هه‌مى توشبوویان دخوازم، سوپاس و ده‌ستخوشى بو پێشممه‌رگه و ئاسایش و زێره‌ڤانى و هه‌وارهاتنێ و هه‌مى ئه‌وێن بجهئینانا خوپارێزیێ دا هاریكار و پشته‌ڤان بووین.
خوشتڤیان..
نه‌وروز جه‌ژنا پیروزا نه‌ته‌وه‌یى و هێمایێ سه‌ركه‌فتن و ژیان و ئازادیا گه‌لێ كورده و ده‌ستپێكه‌كا نوى یه، وه‌ك هه‌رده‌م هیڤى و هێزێ دده‌ت. بلا ئه‌م هه‌مى د ده‌ستپێكه‌كا نوى دا بخودا بچینه ڤه، و مفا ژ خه‌له‌تیێن بورى وه‌رگرین و د دلوڤان و ب لێبورین بین. بلا ئه‌م هه‌مى ب ئومێد و گه‌شبینى سه‌حكه‌ینه پاشه‌روژه‌كا گه‌شتر. هه‌مى هێز و شیانێن خو بكه‌ینه ئێك و پێكڤه كار بكه‌ین و ملێن خو بده‌ینه به‌ر و رێكێن دژوار و نه‌خوش ده‌ربازبكه‌ین.
سه‌ركه‌فتن و به‌ره‌فپێشچوون و ژیان و گوزه‌رانیه‌كا باشتر بو وه‌لاتیان و مسوگه‌ركرنا مافێ دستورى یێن خه‌لكێ كوردستانێ و ئێكرێزى و و ته‌بایا مه دخوازیت. دڤێت دوماهى ب ململان و ناكوكیێن لایه‌نێن سیاسى یێن كوردستانێ بهێت كو ژبلى زیانێ چ تشتێ دى بو كوردستانێ ژێ په‌یدانه‌بویه . بلا ئه‌م هه‌مى وبلا هه‌مى پێكهات پێداچونه‌كێ بخودا بكه‌ن بو پاشه‌روژه‌كا باشتر بو كوردستانێ پێكڤه كاربكه‌ین .
كوردستانیێن عه‌زیز بو چاره‌سه‌ركرنا كێشان دگه‌ل حكومه‌تا فیدرال وكێشێن عیراقێ بگشتى دوپات دكه‌مه‌ڤه كو هه‌رێما كوردستانێ دێ هاریكار بیت ژپێخه‌مه‌ت سه‌قامگیرى وئاشتى وپاشه‌روژه‌كا باشتر بو وه‌لاتى هه‌مى بزاڤا بكه‌ین دڤێت هه‌مى لایه‌ك باش بزانیت كو چاره‌سه‌ركرنا كێشێن هه‌رێما كوردستانێ دگه‌ل حكومه‌تا فیدرال كلیلا ئارامى وسه‌قامگیرى وپێشكه‌فتنا عیراقێ یه . ئه‌م بو هه‌مى چاره‌سه‌ریه‌كێ دئاماده‌ینه كو مافێن ره‌وایێن گه‌ل وپێكهاتێن عیراقێ تایبه‌تمه‌ندى ومافێن دستورى یێن هه‌رێما كوردستانێ مسوگه‌ر بكه‌ت . سیسته‌مێ فیدرالى وپره‌نسیپ وبنه‌مایێن هه‌ڤپشك وسازان وهه‌ڤسه‌نگیا راسته‌قینه بپارێزیت . داخوازێ ژ جڤاكێ ده‌وله‌تى ونه‌ته‌وه‌یێن ئێكگرتى دكه‌ین پشته‌ڤان وهاریكاربن دچاره‌سه‌ركرنا كێشێن عیراقێ دا. هه‌ر دڤێ هه‌لكه‌فتێ دا دوپات دكه‌ین كو هه‌رێما كوردستانێ وه‌كى هه‌رده‌م ب فاكته‌رێ ئارامى وسه‌قامگیری وپێكڤه‌ژیان ولێبورین وئیكودوقه‌بویلكرن ل ده‌ڤه‌رێ دێ مێنێت دكاركرن وهاریكارى وهه‌ماهه‌نگیا دگه‌ل هه‌فپه‌یمانان و جڤاكێ ده‌وله‌تى به‌رده‌وامبیت لسه‌ر بنه‌مایێ بها وبه‌رژه‌وه‌ندیێن هه‌ڤپشك دێ پێشڤه‌چونێ ب په‌یوه‌ندى وهاریكارى وههڤپشكیێ دگه‌ل وه‌لاتیێن ده‌ڤه‌رێ وجیهانێ ده‌ت . دێ بهه‌مى شیانێن خودگه‌ل جیهانێ روى ب روى تیرور وتوندره‌ویێ بین . هه‌ر دڤێ هه‌لكه‌فتێ دا داخواز ژ وه‌لاتیێن هێژا دكه‌م دگه‌شت وسه‌یرانان دا هه‌مى رێكارێن خوپارێزى وقانونێن هاتن وچونێ ب تمامى په‌یره‌و بكه‌ن وخو وسروشتێ جوانێ كوردستانێ بپارێزن خودایێ مه‌زن كوردستان وكوردستانیان بپارێزیت . جه‌ژنا نه‌روزێ ل هه‌وه هه‌میان پیروزبیت هیڤیدارین ئه‌م هه‌مى جه‌ژن وهه‌لكه‌فتێن بهێن دسه‌قا وره‌وشه‌كا باشتر دا بكه‌ین
نێچیرڤان بارزانى سه‌روكێ هه‌رێما كوردستانێ
