جێگرێ سه‌روكا فراكسیونا پارتى دیموكراتى كوردستان ل جڤاتا نوینه‌رێن عیراقێ راگه‌هاند : ئه‌ڤرو پروژه قانونا بودجا گشتیا عیراقێ گه‌هشتیه په‌رله‌مانى و فراكسیونا پارتى ژى ده‌ستپێشخه‌ریه‌ك به‌رهه‌ڤكریه بو هندێ كورد هه‌مى پێكڤه سه‌باره‌ت پروژه قانونا بودجێ ئێك ده‌نگبن.
بشار كیكى راگه‌هاند پروژێ قانونا بودجا عیراقێ گه‌هشتیه جڤاتا نوینه‌ران و بریاره ده‌مێ ڤه‌دگه‌ر‌ینه جڤاتێ بو دان و ستاندنان ل سه‌ر پروژه بودجا عیراقێ یا سالا دوهزاروبیست وئێكێ ،سه‌روك فراكسیونێن كوردى دگه‌ل جێگرێ دووێ یێ سه‌روكێ په‌رله‌مانى كومببن و دان و ستاندن بهێنه‌كرن و ئه‌ڤه ژى ده‌ستپێشخه‌ریا فراكسیونا پارتى یه دا بشێین بودجێ د به‌رژه‌وه‌ندیا كوردان دا ده‌ربازبكه‌ین و ئێك هه‌لویست بین .
هه‌روه‌سا گوت ژى : راسته یا ب ساناهى نینه پروژه قانونا بودجێ ده‌ربازبكه‌ین به‌لێ یا ب زه‌حمه‌ت ژى نینه و ئێك ده‌نگیا كوردان دشێت گه‌له‌ك تشتا بكه‌ت و بودجێ ده‌ربازبكه‌ت و دێ هه‌مى بزاڤا كه‌ین كو پشكا كوردان دناڤ بودجێ دا بهێته بنه‌جهكرن دده‌مێ په‌سه‌ندكرنێ دا .
