بالیوزخانا ئه‌مریكا ل دیمه‌شقێ پشته‌ڤانیا خو بو دان و ستاندنێن كوردى كوردى ل روژئاڤایێ كوردستانێ راگه‌هاند و ته‌ئكید كر ژى ژنێزیك ڤه چاڤدێریا پێشكه‌فتنا وان دان و ستاندنان دكه‌ین.
دتویته‌كیدا ل هژمارا خو یا تایبه‌ت ل سه‌ر تورا جڤاكى یا تویته‌رى بالیوزخانا ئه‌مریكا ل دیمه‌شقێ نیڤیسیه ویلایه‌تێن ئێكگرتى یێن ئه‌مریكا پشته‌ڤانیا دان و ستاندنێن كوردى كوردى دكه‌ت و چاڤدێریا پێشكه‌فتنا وان دان و ستاندنان دكه‌ت.
ئاماژه ب وێ چه‌ندێ ژى دایه لدویڤ بریارا ژماره 2هزارو254 یا جڤاتا ئیمناهیێ، ئه‌و دان و ستاندن پشته‌ڤان وتمامكه‌رن بو پروسه‌یه‌كا به‌رفره‌هتر یا سیاسى، پاشه‌روژه‌كا روهنتر ژى بو خه‌لكێ سوریا دێ بده‌ستڤه ئینیت.
ئه‌ڤه نێزیكى ساله‌كێ یه دان و ستاندن دناڤبه‌را جڤاتا كوردى و حزبێن دناڤ رێڤه‌به‌ریا خوسه‌ر دا ب سه‌رپه‌رشتیا ئه‌مریكا برێڤه‌دچن، بو وێ ئارمانجێ لێكنێزیكبوونه‌ك په‌یدا ببیت دا هه‌لویستێ كوردان ل سوریا ببیته ئێك.
ئه‌و هه‌لویستێ ئه‌مریكا پشتى وێ چه‌ندێ دهێت ئالدار خه‌لیل كو سه‌ركرده‌كێ په‌یه‌دێ یه هێرش كرى یه سه‌ر پێشمه‌رگێن روژ و بزاڤ كرى ئاریشان بو گه‌نگه‌شه‌یا ناڤخویا كوردى دروست بكه‌ت
