کوڤارا فۆرین پۆلسی یا ئەمریکی بابەتەک لدۆر پرسا عیراقێ بەلاڤکر و بەحس ل وێ چەندێ دکە ت کو تەقینا تیرۆرستی یا پێنجشەمبیا بۆری دڤێت زەنگەکا ئاگەھدار کرنێ بیت بۆ بایدنی و کۆچکا سپی هه‌تا کو وەکو ترامپی عیراقێ پشت گوهـ نەھاڤێژن و گرنگیێ ب رەوشا عیراقێ بدەن.
وێ کوڤارێ دیارکر ژی کو ھەلبژارتنێن داھاتی ل عیراقێ دەلیڤەکا گرنگە گوھۆرین درەوشا وەلاتی ودانانا سنورەکێ بۆ کارێگەری و ھەژموونا ئیرانێ لسەر عیراقێ بیت، ئەڤە ھەکە ئەمریکا و حوکمەتا نووى ل وی وەلاتی ب سەرۆکایەتیا بایدنی پتر گرنگیێ ب عیراقێ بدەن و وەکو دونالد ترامپی حوکمەتا عیراقێ پشت گوهـ نەھاڤێژیت و عیراقێ بۆ ئیرانێ بجهـ بھێلن.
ھەروەسا بەلاڤکر ل پێنجشەمبیا بۆری دوو پەقینێن خوکوژی ل بەغدا روویدان و ٣٢ کەس ھاتنە کوشتن و ١٠٠ کەس ژی برینداربوون، ئەڤە ژی خویناوی ترین ھێرش بوو د دەمێ دوو سالێن بۆری دا دیسان پشتی رۆژەکێ بتنێ بوو ژ وەرگرتنا بایدنی بۆ دەستھەلاتێ ل ئەمریکا، ھەرچەندە کریارەکا تاوانکاری و تیرۆرستی یا نەچاڤەرێکری بوو، د ھەمان دەم دا ئەو وەکو زەنگەکێ بوو کو پاشەرۆژا عیراقێ ھەتا نوکە یا ئاشكرا و دیار نینە و دووماھی ب تیرۆرێ نەھاتیە و ھەتا نوکە عیراق یا دبن گەف و مەترسیێن مەزن دا و توندرەو ب بەردەوامی دشێن گرفت و کریارێن ترسناک ئەنجام بدەن.
دیارکر ژی کاریگەریا ستراتیژیا سەرکەفتنێ ل عیراقێ ژلایێ ئەمریکا ڤە، لسەر تمامیا رۆژھەلاتا ناڤین دێ رەنگ ڤەدەت، بەرۆڤاژی ژی ھەر راستە، ھەکە ئەمریکا ل عیراقێ یا سەرکەفتی نەبیت، دێ ل ھەمى رۆژھەلاتا ناڤین زیان گەھیتێ، لەوما عیراق بوویە خالا شکەستن و سەرکەفتنا ئەمریکا ل رۆژھەلاتا ناڤین و جیھان ب گشتی و عیراق ب تایبەتی چاڤەرێ رەفتارا ئیدارا ئەمریکی یا نووى و تیما جۆ بایدنی یه ل بەرامبەر عیراقێ دکەت”.
وێ کۆڤارا ئەمریکی ئاماژەکر وێ چه‌ندێ ژى لایەنێ ھەرە گرنگ و ئەرێنی یا ئیدارا نووى یا ئەمریکی شارەزایی و ئاشنایی زۆر یا سەرۆکێ نووى بایدنی و بەرپرسێن حوکمەتا وی ب کاروبارێن عیراقێ و رۆژھەلاتا ناڤین، ئەو بتمامی نێزیکی روویدانانە و زوورترین ھووردەکاری لدۆر رەوشا عیراقێ ل بەردەستن، چونکە پێشتر ھەر جۆ بایدن بخو بەرپرسێ بادەکا عیراقێ بوو ل دوو خۆلێن سەرۆکایەتیا باراک ئۆبامای کو وی دەمی بایدن جێگرێ سەرۆکێ ئەمریکا بوو.
