په‌رسیڤا بالندا دناڤ زه‌ڤیێن په‌لاوه‌ران ل پارێزگه‌ها سه‌لاحه‌ددین به‌لاڤبویه و زێده‌تر ژ شێست هزار په‌لاوه‌ران ژناڤچوینه ، هنارتنا مریشكان قه‌ده‌غه‌كریه و ل هه‌رێما كوردستانێ ژى سوبه‌هى لژنا په‌رسیڤا بالندا دێ كومبیت و بریارێن پێدڤى دێ ده‌ت
حسێن حه‌مه كه‌ریم ئاخفتنكه‌رێ وه‌زاره‌تا چاندنێ ل هه‌رێما كوردستانێ راگه‌هاند ، ئاگه‌هداریا په‌رسیڤا بالندا ل زه‌ڤیێن په‌لاوه‌ران ل سامه‌را به‌لاڤبوینه ، بریاره سوبه‌هى لژنا په‌رسیڤا بالندا دگه‌ل وه‌زیرێ چاندنێ كومبیت ب مه‌ره‌ما به‌رسینگرتنا رێكاران و بریارێن پێدڤى بو خو پاراستن ژ ڤێ ڤایروسێ
وه‌زاره‌تا چاندنێ ل عیراقێ به‌لاڤكریه ل دوو زه‌ڤیێن په‌لاوه‌ران ل قه‌زا سامه‌را ل پارێزگه‌ها سه‌لاحه‌ددین په‌رسیڤا بالندا به‌لاڤبویه د ئه‌نجامدا نێزیكێ 60 هزار سه‌رێن په‌لاوه‌ران ژناڤچوینه ، لژنا په‌رسیڤا بالندا دێ كومبیت و رێكارێن پێدڤى دێ گرنه به‌ر بو كونترولكرن و رێگریكرنا زێده‌تر یا به‌لاڤبونێ ژوانا ئه‌و مریشكێن كو توشبوین، پاقژكرن و ده‌رمانكرن ب دویراتیا سێ كیلومه‌تران و ئه‌نجامدانا چه‌ند پشكنینان
لدویڤ وه‌زاره‌تا چاندنا عیراقێ كو رێكخراوا ساخله‌میا جیهانێ كریه ژێده‌ر، ئه‌ڤ نه‌خوشیه بارا پتریا وه‌لاتان گرتیه ژوانا وه‌لاتێن جیران و ده‌ڤه‌رێ به‌لاڤبویه
وه‌زاره‌تا چاندنێ داخواز ل هه‌مى زه‌ڤیێن په‌لاوه‌ران دكه‌ت رێكارێن پێدڤى بكار بینن، هه‌وره‌سا داخواز ژ هه‌مى ده‌زگایێن ئه‌منى و ده‌سته‌یا سنوران و گومرك و فه‌رماندێن ئوپراسیونان دكه‌ت كو هاتنا مریشكان ب سه‌رژێكرى و ساخ قه‌ده‌غه بكه‌ن چونكه ئه‌ڤ نه‌خوشیه به‌لاڤبویه
