نڤیسینگه‌ها مه‌رجه‌عێ بلندێ شیعان راگه‌هاندنه‌ك سه‌باره‌ت ناڤه‌روكا كومبوونا عه‌لى سیستانى دگه‌ل پاپا فرانسیس به‌لاڤكریه كو تێدا هاتیه، ئه‌ڤرو سه‌ماحه‌تا عه‌لى سیستانى دگه‌ل پاپایێ كلیسا كاسولیكى یا وه‌لاتێ ڤاتیكان پاپا فرانسیس كومبوویه.
لدویڤ راگه‌هاندنێ د كومبوونێ دا، گه‌نگه‌شه لسه‌ر وان ئاسته‌نگێن مه‌زن كریه كو دڤى سه‌رده‌مى دا روى ب روى مروڤایه‌تیێ بووینه، هه‌روه‌سا رولێ باوه‌ریبوونێ ب په‌یامێن خودێ و پێگیربوون ب بهایێن ئه‌خلاقى بو كونترولكرنا وان ئاسته‌نگان یێن به‌حس لێ كرى.
د راگه‌هاندنێ دا هاتیه د چارچوڤێ كومبوونێ دا عه‌لی سیستانى به‌حسێ وێ چه‌ندێ كریه كو خه‌لكه‌كێ زور ل هژماره‌كا وه‌لاتان ژبه‌ر ئایین و ئازادى یا راده‌ربرینێ و نه‌بوونا دادپه‌روه‌ریا جڤاكى ب ده‌ست زورداریێ هاتینه ترساندن و دنالن بتایبه‌ت ژى ژماره‌كا گه‌لێن ده‌ڤه‌را مه ژبه‌ر شه‌رى و كریارێن توندوتیژیێ و دورپێچێن ئابوورى بتایبه‌ت ژى خه‌لكێ فه‌لستینى لسه‌ر ئاخا خو كو هاتیه داگیركرن. هه‌ر دكومبوونێ دا ئاماژه ب وێ چه‌ندێ هاته دان كو پێدڤیه رابه‌رێن ئاینى هانا وه‌لاتێن زلهێز بده‌ن عه‌قل یێ زال بیت لسه‌ر زمانێ شه‌رى و نابیت به‌رژه‌وه‌ندیێن خو لسه‌ر حسابا ژیانا ئازادى و كه‌رامه‌تا گه‌لان سه‌ربێخن.
