ئەڤرۆ دكتور عەلی تەتەر پارێزگه‌رێ دهۆکێ پێشوازی ل ئایدن مەعروف وەزیرێ هەرێمێ بۆ کاروبارێن پێکهاتەیان ب بەرهەڤبوونا کلارا عودیشو یەعقوب سەرۆکا فراکسیۆنا جڤاتا گەلێ کلدانی و سریانی و ئاشۆری ل په‌رله‌مانێ كوردستانێ کر.
دهەڤدیتنه‌كێدا پشتی بخێرهاتنێ وەزیرێ هەرێمێ بۆ کاروبارێن پێکهاتەیان دا دیارکرن: سەرەدانا پارێزگەها دهۆکێ کریە ب مەرەما ژ نێزیک ئاگەهداربوون ل رەوشا خۆیشک و برایێن کرستیان و گوهداریکرنا کێشە و گلە و گازندێن وان ببن، دێ سەرەدانا هژمارەکا دەڤەران کەن دچارچووڤێ سەرەدانێن واندا بو پارێزگەهێن هەرێما کوردستانێ، هەروەسا وەزیرێ هەرێمێ بۆ کاروبارێن پێکهاتەیان راگەهاند: پارێزگەها دهۆکێ پارێزگەها پێکڤە ژیانا برایانە و ئاشتیێ یە و ئەم شانازیێ بڤێ پێکڤەژیانێ دکەین. نەتەوا کرستیان ژی وەکی پێکهاتەیەکێ رەسەنێ هەرێما کوردستانێ رۆل و تایبەتمەندیا خۆ هەیە لەورا ئەڤرۆ بۆ دیتنا خۆیشک و برایێن کرستیان مە سەرەدانا پارێزگەها دهۆکێ کریە.
پارێزگه‌رێ دهۆکێ دپەیڤەکێدا ئاماژە ب رەوشا پێکهاتەیان ل سنۆرێ پارێزگەها دهۆکێ کر و دا دیارکرن: لدویڤ بەرنامێ حکۆمەتا هەرێما کوردستانێ و وێ پێکڤەژیانا دیرۆکی و دویر و درێژ ل پارێزگەها دهۆکێ ئەم بزاڤێ دكه‌ین خزمەتا هەمی پێکهاتەیان ب دادپەروەری و یەکسانی بهێتەکرن، و مە هەمی هەول داینە زێدەگاڤی ل سەر مۆلکێ خۆیشک و برایێن کرستیان نەهێتەکرن و ئەم بەردەوام ب رێکێن یاسایی بزاڤا نەهێلانا زێدەگاڤیان و چارەسەرکرنا ڤان ئاریشان دكه‌ین.
