دكتور عەلی تەتەر پارێزگارێ دهۆکێ پێشوازیی ل ئۆلیڤەدیکوتینی قۆنسلێ گشتی یێ کۆمارا فرەنسا ل هەرێما کوردستانێ و شاندەکێ وەزارەتا دەرڤە یا فرەنسا ژسەنتەرێ روی ب رویبوونا قەیرانان کر.
دهەڤدیتنێدا به‌حس ل رەوشا پارێزگەها دهۆکێ و دویماهی پێشهاتێن دەڤەرێ هاتەکرن و دپەیڤەکێدا پشتی بخێرهاتنێ قۆنسلێ فرەنسا هەڤخەمیا خۆ دەربری بۆ رۆیدانا ئاگربەربوونا کەمپا شاریا و بەرهەڤیا وەلاتێ خۆ بۆ هەر هاریکاریەکێ دیارکر و پاشان دپەیڤەکێدا بەحسێ پرۆژێن خزمەتگۆزاری یێن کۆمارا فرەنسا بۆ هەرێما کوردستانێ و عیراقێ کر و راگەهاند پارێزگەها دهۆکێ جهەکێ تایبەت یێ هەی چۆنکی نێزیکی وان دەڤەرانە ئەڤە چەند سالە شەرو ئالۆزی تێدا هەیە و هاتنا وێ هژمارا زۆرا ئاوارە وپەنابەران و هەتا نۆکە ل پارێزگەها دهۆکێ دئاکنجی نە. هەر ژ سالا ٢٠١٤ێ وەرە سەنتەرێ قەیرانان پشتەڤانیا پرۆژان دکەت و ئەڤرۆ ژی بۆ ڤێ مەرەمێ شاندەکێ سەنتەرێ ناڤبری کو سەر ب وەزارەتا دەرڤەیا فره‌نسا یه دگەل مەدایە ژبۆ دویڤچوونا وان جهێن پێدڤی خزمەتگۆزاریێن مرۆڤایەتی، هەر دبەردەوامیا پەیڤا خۆ دا قۆنسلێ گشتی یێ کۆمارا فرەنسا ل هەرێما کوردستانێ ل دۆر سەرەدانا خۆ بۆ دەڤەرا ئامێدیی و ژ نێزیک دیتنا شوینوارێن دەڤەرێ و گرنگیا نۆیژەنکرنا وان شینواران دانوستاندن دگەل پارێزگارێ دهۆکێ کر .
پارێزگارێ دهۆکێ سۆپاسیا شاندێ مێهڤانکر و گۆت: ئەم سۆپاسیا کۆمارا فرەنسا دکەین کو ئەڤە دەمێ چەندین سالانە پەیوەندیێن مە دئاستەکێ گەلەک باشدانە و بەردەوام ژلایێ مرۆڤایەتی و خزمەتگۆزاری ڤە هاریکارییا هەرێما کوردستانێ کرییە و هیڤیدارین ژ هەمی لایەکی رەنگڤە بدەت و بەرەڤ پێشڤەچوونێن زێدەتر بچیت.
