ژپێخه‌مه‌ت ژنێزیك هایداربوون ل سه‌ر ره‌وشا ئاواره وپه‌نابه‌ران ل ناڤ كه‌مپان ئه‌ڤرۆ د.على ته‌ته‌ر پارێزگارێ دهۆكێ ودگه‌لدا به‌رێزان حسین خالد ده‌ڤه‌ردارێ سێمێلێ ورێڤه‌به‌رێ ناوچه‌داریا فه‌یدێ جودا جودا سه‌ره‌دانا كه‌مپێن دومیز ئێك یا په‌نابه‌رێن رۆژئاڤایێ كوردستانێ وشاریا یا ئاواره‌یێن شنگالێ كر وژلایێ سه‌رپه‌رشتێن هه‌ردوو كه‌مپا پێشوازى لێ هاته كرن.
لبه‌راهیێ ل كه‌مپا دومیز ئێك پارێزگارێ دهۆكێ دگه‌ل كارگێریا كه‌مپێ وچه‌ند رێكخراوێن مروڤایه‌تى كومبو ورێڤه‌به‌رێ كه‌مپێ راپورته‌ك ل دور ره‌وشا په‌نابه‌رێن كه‌مپێ وپێدڤیێن پێشكێشكر .
پارێزگارێ دهۆكێ ته‌كه‌زكر كو رونشتڤانێن كه‌مپا دومیز خوشك وبرایێن مه‌نه وهه‌ر كار وخزمه‌ته‌كا بو بهێته كرن وه‌كو ئه‌ركه‌كێ نیشتمانى ونه‌ته‌وه‌یى ومروڤایه‌تى یه وخه‌لكێ كه‌مپێ نه بیانى نه ونابیت هه‌ست بغه‌ریبیێ بكه‌ن ورێز ل هه‌موویان بهێته گرتن وبه‌رهه‌ڤیا حكومه‌تا هه‌رێما كوردستانێ وپارێزگه‌هێ دیاركر بو هه‌ر هاریكاریه‌كێ .
هه‌ر دكومبونێدا به‌رپرسێ سازیا UNHCR خوشحالیا خو دیاركر هه‌مبه‌ر وان خزمه‌ت وره‌فتارا دگه‌ل په‌نابه‌رێن كه‌مپێ دهێته كرن وگوت: من ل چار كێشوه‌ران خزمه‌تا په‌نابه‌ران كریه وئه‌و ره‌فتارا من دیتى یا خه‌لكێ كوردستانێ وسازیێن میرى دگه‌ل په‌نابه‌ران دكه‌ن زۆر یا باش ورێكوپێكه وگریا مروڤى دئینیت.
پاش پارێزگارێ دهۆكێ سه‌ره‌دانا ژورا موختارێن كه‌مپێ وچه‌ند خێزانه‌كا ل ناڤ كه‌مپێ كر وژنێزیك هایدارى ره‌وشا وان بو.
ل دوڤدا پارێزگارێ دهۆكێ وشاندێ پێرا سه‌را كه‌مپا شاریا دا ودگه‌ل كارگێریا كه‌مپێ ورویسپیێن كه‌مپێ وتیپا هونه‌رى یا كه‌مپێ كومبو.
پارێزگارێ دهۆكێ دیاركر كو ئاوارێن كه‌مپا شاریا خوشك وبرایێن مه‌نه و سازیێن حكومه‌تا هه‌رێمێ وپارێزگه‌ها دهۆكێ بێ جوداهى خزمه‌تا هه‌موویان دكه‌ن ، هه‌روه‌سا ته‌كه‌زى ل سه‌ر باشكرنا ره‌وشا ئاواره وپه‌نابه‌ران كر وپشته‌ڤانیا پارێزگه‌هێ نیشان دا بو هه‌ر كار وچالاكییه‌كا ره‌وشه‌نبیرى وهونه‌رى و وه‌رزشى لناڤا كه‌مپێ وخواست كو هه‌موو پێگریێ ب رێنمایێن ته‌ندورستى بكه‌ن وخو ژ نه‌خوشیا كورونا ب پارێزن.
ل دور ئارمانجێن سه‌ره‌دانێ پارێزگارێ دهۆكێ بو سازیێن راگه‌هاندنێ ئاخفت وگوت: ئه‌م هاتینه دا ژنێزیك ره‌وشا ئاكنجیێن هه‌ردوو كه‌مپا بزانین ویا دشیاندا بو بكه‌ین وسازیێن UNژى درازینه ل دور ئه‌و خزمه‌ت وسه‌ره‌ده‌ریا دگه‌ل ئاواره وپه‌نابه‌ران دهێته كرن وخواست كو رێكخراوێن مروڤایه‌تى و حكومه‌تا عیراقا فیدرال پتر هاریكاریا ئاواره وپه‌نابه‌ران بكه‌ت نه‌خاسمه بو دابینكرنا گازا سپى وباشكرنا كوالیتیا ئاهێن خارنێ .
