ئه‌ڤرو دۆمینیك راب وه‌زیرێ ده‌رڤه‌یێ بریتانیا گه‌هشته هه‌ولێرێ و د گه‌ل نێچیرڤان بارزانى سه‌رۆكێ هه‌رێما كوردستانێ كۆمبوو و په‌یوه‌ندیێن دووقولى و ره‌وشا هه‌رێمێ و عیراقێ و ده‌ڤه‌رێ و چه‌ند ته‌وه‌رێن دى یێن گرنگ د كومبونێ دا هاتنه به‌حسكرن.
پشتى كۆمبوونێ نێچیرڤان بارزانى سه‌رۆكێ هه‌رێمێ د كۆنگره‌كێ رۆژنامه‌ڤانی یێ هه‌ڤپشك دا ناڤه‌رۆكا كۆمبوونێ به‌حسكر و راگه‌هاند، وان چه‌ندین بابه‌ت به‌حسكرینه، ژ وان ژى گرنگیدان ب په‌یوه‌ندیێن هه‌رێما كوردستانێ و ئیراقێ ل گه‌ل بریتانیا، ئاریشه‌یێن هه‌ولێر و به‌غدا و بزاڤێن چاره‌سه‌ركرنێ، شه‌رێ دژى تیرۆرێ و مه‌ترسیێن سه‌رهه‌لدان و ب هێزبوونا داعش، هه‌لبژارتنێن بهێت یێن ئیراقێ و ره‌وشا ده‌ڤه‌رێ ب گشتى و چه‌ندین بابه‌تێن دى هاتینه به‌حسكرن.
نێچیرڤان بارزانى گۆت ، ئه‌م په‌یوه‌ندییا هه‌رێمێ د گه‌ل بریتانیا بلند د سه‌نگینین، سوپاسییا پشته‌ڤانیا به‌رده‌وام یا بریتانیا ژ بۆ گه‌لێ كوردستانێ دكه‌ین كو هه‌ڤپشكیا وان ل گه‌ل خه‌لكێ كوردستانێ 30 سالان به‌رى نوكه ده‌ستپێكریه، ده‌مێ كو ل نیسانا 1991 بریتانیا ل گه‌ل وه‌لاتێن جڤاتا ئێمناهیێ بریارا 688ێ ده‌رئێخستى، ئه‌و ژى ده‌ستپێكه‌كا گرنگ بوو كو ئاڤاكرنا په‌یوه‌ندیێن هه‌ڤالینێ ل سه‌ر ئاستێ ده‌وله‌تى دروست ببن.
سه‌رۆكێ هه‌رێمێ گۆت ژى، وه‌لاتێن جى حه‌فت، 15 ملیۆن دۆلار ته‌رخانكرینه بۆ پشته‌ڤانیا شیانێن ئافره‌تان و هیڤیدارین پشته‌ڤانیا وان بۆ هه‌رێمێ و ئیراقێ یابه‌رده‌وام بیت.
نێچیرڤان بارزانى ل دۆر گهۆرینێن ژینگه‌هى راگه‌هاند، كاریگه‌ریێن گهۆرینا ئاڤ و هه‌وایى هێدى هێدى ل هه‌رێما كوردستانێ دیاردبن و چ نه‌مایه هشكه سالى ببیته ئاریشه‌یه‌كا جدی، ئه‌م ل هه‌رێمێ پێگیرین ب رێكارێن ده‌وله‌تى یێن گهۆرینا سه‌قایى ل جیهانێ و مه كار بۆ كێمكرنا گازێن زیانبه‌خشێن وه‌كو دووه‌مێ ئۆكسیدێ كاربۆنى كریه.
ژلایێ خۆڤه دۆمینیك راب وه‌زیرێ ده‌رڤه‌یێ بریتانیا ل دۆر كۆمبوونا خۆ ل گه‌ل سه‌رۆكێ هه‌رێما كوردستانێ راگه‌هاند: سه‌ره‌دانا من گرنگیدانه ب په‌یوه‌ندیێن درێژخایه‌ن، مه دانوستاندنه‌كا گه‌له‌ك باش ئه‌نجامدا و مه به‌حسی گه‌له‌ك بابه‌تان كر وه‌كو سه‌قامگیریا هه‌رێمێ و ئیراقێ، بریتانیا دێ پێگیر بیت ب وه‌به‌رهێنان و بزنسێ ل ڤێ ده‌ڤه‌رێ و دلخۆشین كو هێزێن پێشمه‌رگه‌ى ل گه‌ل هێزێن ئیراقى كاردكه‌ن ژ بۆ ده‌ركرنا داعش، بریتانیا بۆدجه‌یه‌كا تایبه‌ت بۆ هێزێن پێشمه‌رگه‌ى و پاراستنا سامان و كه‌لتورى ته‌رخانكریه.
دۆمینیك راب گۆت ژى، بێگومان دڤێت ئه‌م ئێمناهیا خه‌لكى ل كوردستانێ و ئیراقێ پشت راست بكه‌ین. گۆت ژى، ئه‌م چاڤه‌رێی سه‌ره‌دانا نێچیرڤان بارزانى سه‌رۆكێ هه‌رێما كوردستانێ بۆ له‌نده‌نێ دكه‌ین كو ئه‌ڤه ژى بۆ پتر گرنگیدانه ب په‌یوه‌ندییێن دناڤبه‌را هه‌ردوو لایان دا.
