وه‌زاره‌تا پێشمه‌رگه‌ى یا حكومه‌تا هه‌رێما كوردستانێ راگه‌هاندنا خو یا ژماره 2 به‌لاڤكر و راگه‌هاندیه: ژ ئه‌نجامێ هێرشا ئه‌ڤرویا ل چیایێ مه‌تینى ل سنورێ قه‌زا ئامێدیێ، كو كاروانه‌كێ هێزێن پێشمه‌رگه‌ى ژلایێ هێزێن په‌كه‌كه‌كێ ڤه ده‌ستدرێژیا بێ بهانه كره سه‌ر و دئه‌نجامدا پێنج پێشمه‌رگه شه‌هید بوون و حه‌فت پێشمه‌رگه ژى بریندار بوون.
وه‌زاره‌تا پێشمه‌رگه‌ى راگه‌هاند ژى: د هێرشێ دا هێزێن په‌كه‌كێ چه‌كێن سڤك و گران بكارئینایه، د ده‌مه‌كى دا چوونا هێزێن پێشمه‌رگه‌ى بو وى سنورى ب ئارمانجا پاراستنا ئارامی و ئاسایشا ده‌ڤه‌رێ بوویه، وه‌كى هه‌ر ده‌ڤه‌ره‌كا دى یێ سنورێ هه‌رێما كوردستانێ، هێزێن پێشمه‌رگه‌ى ب مافێ خو دزانن لڤین و سه‌نگه‌رسازیا پێدڤى بكه‌ت.
وه‌زاره‌تا پێشمه‌رگه‌ى راگه‌هاند ژى: لڤێره داخازێ دكه‌ین، حكومه‌تا عیراقێ بله‌ز بێته سه‌ر هێلێ و رێكێ ژ له‌شكركێشی و هێرشێن به‌رده‌وام یێن توركیا بگریت، هه‌روه‌سا داخازێ ژ هێزێن په‌كه‌كێ ژى دكه‌ین، رێزێ ل سنور و سه‌روه‌ریا ئاخا هه‌رێما كوردستانێ بگریت و شه‌رى ل مالا كوردان و هه‌رێما كوردستانێ دویربێخیت.
ل دوماهیێ وه‌زاره‌تا پێشمه‌رگه‌ى راگه‌هاند: به‌هى و سه‌ره‌خوشیێ ل خو و مالباتێن سه‌ربلندێن شه‌هیدێن ڤێ هێرشێ دكه‌ین و چێبوونا بله‌ز ژى بو برینداران دخازین.
