ئاخفتنكه‌رێ وه‌زاره‌تا ساخله‌میا حكومه‌تا هه‌رێما كوردستانێ رادگه‌هینیت پێنج گومان لێكریێن كورونا گوهورى ل هه‌ریێما كوردستانێ هاتینه توماركرن وب ئامیرێن تایبه‌ت ئه‌و حاله‌ت دێ هێنه پشت راستكرن وئه‌نجامێن وان دێ هێنه راگه‌هاندن .
ئه‌ڤرو دكتور ئاسو حه‌وێزى ئاخفتنكه‌رێ وه‌زاره‌تا ساخله‌میا هه‌رێما كوردستانێ سه‌باره‌ت پشكنینا ڤایروسێ كورونا گوهورى راگه‌هاند كو هه‌مى پێدڤی ژ ئامیرێن تایبه‌تمه‌ند وپشكنینێن تایبه‌ت ب ڤایروسى هاتینه دابینكرن. هه‌روه‌سا گوت ژلایێ خوپارێزى وپروتوكولا چاره‌سه‌ركرنێ ڤه چ جوداهى دگه‌ل كورونا دى نینه ،وئه‌و ب هشیارى چاڤدێریا ڤى ڤایروسى دكه‌ن ودپشكه‌كا دى یا ڤێ راگه‌هاندنێ دا هاتیه كو سامان به‌رزه‌نجى وه‌زیرێ ساخله‌میا هه‌رێما كوردستانێ رێڤه‌به‌ریێن ساخله‌میێن پارێزگه‌هـ وئیدارێن سه‌ربخو راسپاردینه بو ئاماده‌كاریێن تمام بو پشكنینێ ل زالگه‌ه وخالێن سنورى وفروكه‌خانه ودویفچونا به‌ركه‌فتیان بكه‌ن وهه‌روه‌سا گوت به‌رهه‌ڤیێن تمام هاتینه كرن بو هه‌ر رێكاره‌ك یان بریاره‌كا ژلایێ لیژنا بلندا به‌رهنگاربوونا كورونایێ ڤه ل هه‌رێما كوردستانێ ڤه بهێته دان بو پشكنینا هه‌ر كه‌سه‌كێ ژ پارێزگه‌هێن دى یێن عیراقێ بهێته هه‌رێما كوردستانێ .
