شیره‌تكارێ ئاسایشا نه‌ته‌وه‌یێ ئه‌مریكا جه‌یك سولیڤان ، توركیا ب ژێده‌ركێ دلگران بو ئه‌مریكا و ده‌وله‌تێن ئه‌وروپى وه‌سفكر، ئه‌ڤه‌‌ژى دبیته هێرشا ئێكێ یا ئیدارا جو بایدنى بو ده‌ستهه‌لاتا سه‌روكێ توركیا ره‌جه‌ب ته‌یێب ئه‌ردوغان
ئیدارا بایدن به‌رى نوكه دئێكه‌م داخویانى دا سه‌باره‌ت توركیا ته‌ئكید ل سه‌ر مه‌سه‌له‌یا ئازادیێ و مافێ مروڤى و داخواز ل حكومه‌تا سه‌روكێ توركیا ره‌جه‌ب ته‌یێب ئه‌ردوغان كر رێزێ ل بریارێن دادگه‌ها ئه‌وروپا بو مافێن مروڤى بگریت و سه‌ركردێ هه‌ده‌پێ سه‌لاحه‌دین ده‌میرتاش و عوسمان كافالا ئازاد بكه‌ت
ژبلى مافێن مروڤى ل توركیا كو دیموكرات ب تایبه‌تى گه‌له‌ك ره‌خنێن توند ل ئه‌نقه‌ره دگرن هه‌روه‌سا كرینا سیسته‌مێ موشه‌كێن روسى ئێس 400 ژلایێ توركیا ڤه هه‌ڤپه‌یمانێن ناتویێ گه‌له‌ك توره كرینه ، ژبه‌ر هندێ ره‌نگه ئه‌مریكا سزایان ب سه‌ردا ب سه‌پینیت ، هه‌روه‌سا ئوپراسیونێن له‌شكه‌رى دژى كوردێن هه‌ڤپه‌یمانێن ئه‌مریكا ل باكورێ سوریا و پشته‌ڤانیكرن ل كومێن توندره‌و ژلایێ توركیا ڤه ب هندێ كو تیروریست نین و دپێدڤى نه بو پاراستنا به‌رژه‌وه‌ندیێن خو ل ده‌ڤه‌رێ
لدویڤ داخویانیێن به‌رى نوكه هوسا دیاره واشنتون دێ هه‌لویسته‌كێ گه‌له‌ك توندترهه‌بیت ، دچاڤپێكه‌فتنه‌كێ دا ل كانونا دوێ یا بورى بایدن ئه‌ردوغان ب ملهور وه‌سفكر بوو و ره‌خنه ل ره‌فتارێن وى به‌رامبه‌ر كوردان گرتبون و گوت دڤێت سه‌روكێ توركیا باجا وان كاران بده‌ت
