لایەنێن سیاسی پڕۆژە بۆ سیستەمێ لامەرکەزی بەرھەڤکرینە و بڕیارە کار بۆ بجھئینانا سیستەمێ لامەرکەزی بھێتەکرن ل ھەرێما کوردستانێ، سەرۆکێ فڕاکسیۆنا پارتی ل جڤاتا پارێزگەھا دھۆکێ ژی راگەھاند ، پارتی دگەل سیستەمێ لامەرکەزیا ئیداری و کارگێڕی یە ئه‌گه‌ر وەکی خو بھێتە بجھئینان ھەروەسا دبێژیت، پارێزگەھا دھۆکێ دێ یا مفادار بیت ژ ڤی سیستەمی.
ھشیار فەریق، سەرۆکێ فڕاکسیۆنا پارتی دیموکراتی کوردستان ل جڤاتا پارێزگەھا دھۆکێ بۆ رۆژناما ئەڤرۆ گۆت” ئەم وەکی فڕاکسیۆنا پارتی ل جڤاتا پارێزگەھا دھۆکێ دگەل سیستەمێ لامەرکەزی نە، چونکە پارتی ژی دگەل سیستەمێ لا مەرکەزی یە ل ھەرێما کوردستانێ ئەوژی بۆ دابەزاندنا دەستھەلاتان ژبۆی پارێزگەھان، چونکە ئه‌گه‌ر دەستھەلات ب پارێزگه‌ر و یەکەیێن ئیداری بھێنەدان، بێگومان دێ وەلاتی زویتر شێت پەیاما خو گەھینیت و ئاریشا خو چارەسەر کەت”.
ھشیاری زێدەتر گۆت” ئەم ب مەرجەکی دگەل سیستەمێ لامەرکەزیا کارگێری و دارایی نە، کو ئەو سیستەمێ لا مەرکەزی وەکی خو بھێتە چەسپاندن، نەکو ببیتە ئەگەرەک بۆ ژێكڤه‌كرنا ھەرێما کوردستانێ و چ زیان ژی بۆ پێگەھێ ھەرێما کوردستانێ نەبن، لەوڕا ژی د خۆلا دوویێ یا جڤاتا پارێزگەھێن ھەرێما کوردستانێ دا قانوونا ھژمار سێ یا جڤاتا پارێزگەھان یا سالا ٢٠٠٩ێ دەستپێکەک بوویە بۆ لامەرکەزیێ، ئەم ھەمى ببینە خودانێ ڤی پرۆژەی نەکو بتنێ پارێزگەھەکێ ڤەگریت و ڤێ پارێزگەھێ ژ ھەرێما کوردستانێ ڤەقەتینیت، ئه‌گه‌ر پڕۆژێ لامەرکەزی ب ره‌نگەکێ باش بکەڤیتە د بیاڤێ بجھئینانێ دا، چ گومان تێدانینە دێ ئێکسانیەکا جڤاکی ژی پەیدابیت”.
سەرۆکێ فڕاکسیۆنا پارتی ل جڤاتا پارێزگەھا دھۆکێ ئاماژەکر”ئه‌گه‌ر پڕۆژێ سیستەمێ لامەرکەزی سەربگریت، پارێزگەھا دھۆکێ دێ مفادارترین پارێزگەھا ھەرێما کوردستانێ بیت، ژ بەر کو ژ ھەمى لایەنان ڤە ئەم گەلەک د مەغدوورین، بەلێ ئەم دگەل بکارئینانا درووشمێن سیاسی و موزایەدێ نینین بۆ سیستەمێ لامەرکەزی، ئانکو ئەم دگەل لێدانا پێگەھێ ھەرێما کوردستانێ نینین بناڤێ چ سیستەم و پرۆژەیان، بەلکو ئەم دگەل نیەتەکا پاقژین بۆ زێدەتر خزمەتکرنا خەلکێ خو”.
ھشیار فەریق دیارکر”پێدڤیە لیژنێن قانوونی ل جڤاتێن پارێزگەھان ل ھەرێما کوردستانێ و کەسێن شارەزا کار بۆ بەرھەڤکرنا پڕۆژە قانوونەکێ بکەن و کۆنفرانسەک بھێتە گرێدان، دا هه‌مى پشکداریێ بکەن و پڕۆژەیەکێ ئێکگرتی و سەردەمیانە بھێتە بەرھەڤکرن، پڕۆژە بتنێ یێ سلێمانیێ نینە، ھەر ژدەستپێکا ڤێ خۆلا جڤاتێن پارێزگەھان داخواز ھاتیەکرن بۆ لامەرکەزیا ئیداری وەکی من ئاماژە ب وێ چەندێ کری ئەم وەکو پارێزگەھا دھۆکێ دێ ژ ھەمى پارێزگەھان مفادارتربین”.
