پشتی دەرکەفتنا ھندەک حاله‌تێن توشبوونێ ب کۆرۆنا گوهوڕ، چەندین رێکارێن نوى ھاتنە بجھـ ئینان، ئەوژی قەدەغەکرنا ھاتنا گڕوپێن گەشتیارى بۆ پاڕێزگەھا دھۆکێ بۆ ده‌مه‌كێ نەدیار.
رێوار محەمەد رەشید، پەیڤدارێ ڕێڤەبەریا گشتی یا گەشت و گوزارێ ل دھۆکێ گۆت، پشتی دەرکەفتنا ھندەک حاله‌تێن توشبوونێ ب ڤایرۆسێ کۆرۆنا گوهوڕ ل ھەرێمێ و رێکارێن ساخلەمیێ توندتربووین، و لدویڤ بریارا وەزارەتا ساخلەمیێ و لژنا بلندا بەرھنگابوونا کۆرونایێ ھاتنا گروپێن گەشتیاری بۆ پاڕێزگەھا دھۆکێ ھاتە قەدەغەکرن و ئەڤ بریارە ژی یا ده‌مكییه.
ناڤبرى دیار کر، ئەو گەشتیارێن سەرەدانا پاڕێزگەھا دھۆکێ دکەن پترییا وان ب شێوێ گروپ دھێن و بۆ ده‌مێ سێ یان چار ڕۆژان دمینن، دویماهى گڕوپ ژی کو سەرەدانا دھۆکێ کری ل ڕۆژا پێنج شەمبیا بووری بوو کو ھژمارا وان ۱٥۰۰ گەشتیاربوون، و دوھی ٧٢ ده‌مژمێر مۆلەت ب وان ھاتە دان کو ڤەگەرنە پاڕێزگەھێن خو، ژ نوكه وێڤە گەشتیار دشێن ب ترومبێلێن خو سەرەدانا دھۆکێ بکەن به‌لێ وەکی گروپ نابیت بھێنە د ناڤا پاڕێزگەھا دھۆکێ دا.
ناڤبری گۆت ، پشتی کو ل ھندەک پاڕێزگەھێن عیراقێ قەدەغەیا ھاتنوچوونێ ھاتییە ڕاگەھاندن ئەڤێ چه‌ندێ هه‌‌تا ڕادەیەکێ کارتێکرن لسه‌ر ھاتنا گەشتیاران بۆ پاڕێزگەھا دھۆکێ کر.ھژمارا ھاتنا گەشتیاران بۆ پاڕێزگەھا دھۆکێ بەر ب زێدبوونێ چوویه بتنێ د هه‌یڤا بووری دا نێزیکی ۳۲ ھزار گەشتیاران سەرەدانا پاڕێزگەھا دھۆکێ کربوون.
