نێچیرڤان بارزانى سه‌روكێ هه‌رێما كوردستانێ ب هه‌لكه‌فتا وه‌غه‌ركرنا دكتور روژ نورى شاویس ئه‌ندامێ مه‌كته‌با سیاسى یا پارتى دیموكراتى كوردستان په‌یامه‌كا هه‌ڤخه‌میێ به‌لاڤكر ئه‌ڤه ژى ده‌قێ وێ یه:
بنه‌مال و هه‌ڤسه‌نگه‌ر و هه‌ڤالێن دكتور روژ نورى شاویس ده‌نگ و باسى وه‌غه‌را دوماهیێ یێ پێشمه‌رگێ فه‌رمانده و سیاسه‌تمه‌دارێ ناڤدارێ كوردستانێ و ئه‌ندامێ مه‌كته‌با سیاسى یا پارتى دیموكراتى كوردستان دكتور روژ نورى شاویس گه‌له‌ك خه‌مگین و دلته‌نگ كرین. بڤێ هه‌لكه‌فتا نه‌خوش سه‌ره‌خوشیێ ل هه‌وه و هه‌مى گه‌لێ كوردستانێ دكه‌م و هه‌ڤخه‌مێ هه‌وه هه‌میانم.
وه‌ك سه‌روكێ حكومه‌تێ و سه‌روكێ په‌رله‌مانێ كوردستانێ روله‌كێ به‌رچاڤ د بجهئینانا پروژان و ده‌رئێخستنا قانونێن گه‌له‌ك باش بو خه‌لكێ هه‌رێما كوردستانێ هه‌بووینه، لسه‌ر ئاستێ عیراقێ وه‌ك جێگرێ سه‌روك وه‌زیران روله‌كێ به‌رچاڤ دپاراستنا مافێن گه‌لێ كوردستانێ دا هه‌بوویه. د هه‌مى قوناغ و پێگه‌هێن خودا ب راستى و ب كریار و نیشتیمانپه‌روه‌رانه خو سه‌لماندیه.
ده‌مێ دكتور روژ بویه سه‌روكێ كابینا سێیێ یا حكومه‌تا هه‌رێما كوردستانێ شانازیا وێ چه‌ندێ من هه‌بوو وه‌ك جێگر دحكومه‌تا وى دا كار بكه‌م و ژ ئه‌زمون و شاره‌زایا وى فێرببم، هه‌روه‌ك چه‌وا ئه‌و و كه‌سایه‌تیێن زێرینێن سه‌ركردایه‌تیا پارتى پشتى وه‌غه‌ركرنا دوماهیێ یا بابێ من، گه‌له‌ك فێركرم و گه‌له‌ك پشته‌ڤانێ من بوو، دكتور روژ ئێك ژ وان سه‌ركردێن زێرین یێن پارتى بو كو جهێ رێزه‌كا گه‌له‌ك تایبه‌تن، د روژانێن گه‌له‌ك دژوار و به‌رته‌نگ دا هه‌ر زوى ئالایێ خه‌باتێ بلند كر و ب دل گه‌رمیه‌كا زێده‌تر درێژه ب بزاڤا رزگاریخوازیا نیشتیمانى یا كوردستانێ دا.
دكتور روژ ژ بنه‌ماله‌یه‌كا ناڤدار و ره‌وشه‌نبیر و شوره‌شگێر یا سلێمانیێ بوو. كه‌سه‌كێ گه‌له‌ك خودان شیان بوو، هه‌مى شیان و گه‌نجاتیا خو پێشكێشى گه‌لێ خوكر. ژ ده‌ستدانا دكتور روژ زیانه‌كا گه‌له‌ك یا مه‌زنه بو هه‌مى گه‌لێ كوردستانێ ژبه‌ر وێ چه‌ندێ ژى وه‌غه‌ركرنا وى به‌هیا هه‌مى گه‌لێ كوردستانی یه. دكتور روژ ب تێكوشانه‌كا دژوار و دلسوزانه بو نه‌ته‌وه‌یا خو و هه‌مى گه‌لێ كوردستانێ ناڤێ خو بو هه‌رده‌م د دیروكا كوردستانێ دا نه‌خشاند.
خودێ مه‌زن گیانێ وى شاد بكه‌ت و دلفره‌هیێ ب بنه‌مال و كه‌سوكار و هه‌ڤالێن وى و هه‌مى گه‌لێ كوردستانێ بده‌ت
نێچیرڤان بارزانى
سه‌روكێ هه‌رێما كوردستانێ
پازده‌یى هه‌یڤا دوو دوهزار و بیست و ئێك
