نێچیرڤان بارزانى سه‌روكێ هه‌رێما كوردستانێ دووپاتكر كو لسه‌ر بزاڤێن خو دبه‌رده‌وام بن و دێ كار كه‌ن بو وێ چه‌ندێ كێشێن ئێزدیان و ده‌ڤه‌را شنگالێ بهێنه چاره‌سه‌ركرن و دڤى بیاڤى دا دگه‌ل لایه‌نێن په‌یوه‌ندیدار یێن حكومه‌تا عیراقێ و جڤاكێ ده‌وله‌تى هه‌مى هاریكارى و هه‌ماهه‌نگیه‌كا پێدڤى دێ كه‌ن.
د دیداره‌كێدا دگه‌ل خاتین نادیا موراد چالاكڤانا ئێزدى و رزگاربوویا ده‌ستێ داعش، سه‌روكێ هه‌رێما كوردستانێ بزاڤێن نادیا مورادێ پێخه‌مه‌ت خزمه‌تكرنا ئێزدیان بلند سه‌نگاند و ئاماده‌یا هه‌رێما كوردستانێ بو پشته‌ڤانیكرنا هه‌ر كار و پروژه‌كێ بو خزمه‌تكرنا ئێزدیان ده‌ربرى.
ژلایێ خوڤه نادیا موراد سوپاسیا سه‌روكێ هه‌رێما كوردستانێ كر بو به‌ره‌ف پێشڤه‌برنا دوسیا ئێزدیان و خزمه‌تكرنا وان.
هه‌روه‌سا هه‌ردوو لا پرسا زڤراندنا كومه‌كا روفاتێن قوربانیێن ئێزدى بو گوندێ كوچو و رێككه‌فتنا شنگالێ و چه‌ند بابه‌تێن دى یێن پێدڤى ب كاروبارێن ئێزدیان ڤه گه‌نگه‌شه‌كرن.
