نێچیرڤان بارزانى سه‌رۆكێ هه‌رێما كوردستانێ پێشوازى ل فرانسواز دوما سه‌رۆكا كۆمسیۆنا به‌ره‌ڤانیا نه‌ته‌وه‌ى و له‌شكه‌رى ل په‌رله‌مانێ فره‌نسا و شاندێ دگه‌ل دا كر.
نێچیرڤان بارزانى دگه‌ل فرانسواز دۆما، سه‌رۆكا كۆمسیۆنا به‌ره‌ڤانیا نه‌ته‌وه‌ى و له‌شكه‌رى ل په‌رله‌مانێ فره‌نسا و شاندێ دگه‌ل دا كۆمبوو و راگه‌هاند؛ وه‌لاتێ فره‌نسا ل ده‌مێن دژوار دا پشته‌ڤانییا مرۆڤى و سه‌ربازى و سیاسى یا هه‌رێما كوردستانێ كرییه و هیڤى خواست فره‌نسا ل سه‌ر وان هاریكارییان بۆ ئیراقێ و هه‌رێما كوردستانێ به‌رده‌وام بیت.
نێچیرڤان بارزانى و فرانسواز دۆما دویماهیك پێشهاتێن ره‌وشا ئه‌منى یا ئیراقێ و هه‌رێما كوردستانێ و كریارێن تیرۆرستى یێن رێكخستنا تیرۆرستییا داعشێ و رۆلێ هێزێن فره‌نسى و هه‌ڤپه‌یمانییا ده‌وله‌تى د هاریكاریكرن و پشته‌ڤانییا ئیراقێ و هه‌رێما كوردستانێ بۆ به‌رهنگاربوونا تیرۆرێ گه‌نگه‌شه‌كرن.
هه‌ردولا ئێك بوچوون بون كو داعش هێشتا گه‌ف و ترسه‌كا مه‌زنه لسه‌ر ئێمناهیا ده‌ڤه‌رێ و بۆ ژناڤبرنا ئێكجارى یا وان ئیراق و هه‌رێما كوردستانێ پێدڤى ب به‌رده‌وامى و پشته‌ڤانییا هه‌ڤپه‌یمانییا ده‌وله‌تى یه.
هه‌روه‌سا پێئێشخستنا په‌یوه‌ندییێن هه‌ڤپشك یێن هه‌رێما كوردستانێ و ئیراقێ دگه‌ل فره‌نسا و په‌یوه‌ندییێن ئیراقێ و هه‌رێما كوردستانێ دگه‌ل وه‌لاتێن ده‌ڤه‌رێ و هه‌لبژارتنێن بهێت یێن ئیراقێ و چاره‌سه‌ركرنا كێشێن به‌غدا و هه‌ولێرێ و ماددێ 140 یێ ده‌ستوورى، لایه‌نه‌كێ دى یێ كۆمبوونێ بوون.
