نێچیرڤان بارزانى: سه‌ركه‌فتنا گوپیتكا گه‌نداڤى دێ كارتێكرن ل سه‌ر ئێمناهیا ده‌ڤه‌رێ هه‌بیت

سه‌روكێ هه‌رێما كوردستانێ د راگه‌هاندنه‌كێ دا دیاركر كو سه‌ركه‌فتنا گوپیتكا هاریكاریا كه‌نداڤى دێ كاریگه‌ریه‌كا ئه‌رینى لسه‌ر سه‌قامگیریا ده‌ڤه‌رێ هه‌بیت . نێچیرڤان بارزانی سه‌روكێ هه‌رێما كوردستانێ راگه‌هاند كو ئه‌م پێشوازیێ ل سه‌ركه‌فتنا كارێن كونفراسێ گوپیتكا جڤاتا هاریكاریا كه‌نداڤى دكه‌ین ودێ مه‌ راگه‌هاندنه‌كا هه‌ڤپشك هه‌بیت دراگه‌هاندنێ ئاماژه‌ ب وێ چه‌ندێ هاتیه‌ كرن كو پێشوازیێ ل ڤه‌كرنا سنوران وكاركرن بو نه‌هێلانا ناكوكیان دناڤبه‌را وه‌لاتێن كه‌نداڤی دكه‌ین  . پشتى سێ سالان ژ ڤه‌قه‌تیانا په‌یوه‌ندى وگرتنا سنورێن دناڤبه‌را وان دا گرێیا سیاسی دناڤبه‌را ریاز وده‌وحه‌ ب ڤه‌كرنا سنوران وهه‌مبێزكرنا میرێ قه‌ته‌روشاهێ سعودیه‌ ل گوپیتكا چل وئێكێ یا جڤاتا هاریكاریا وه‌لاتێن كه‌نداڤى ل پارێزگه‌ها عه‌ولا یا سعودیێ بدوماهیك هات . قه‌ته‌ر د سێ سالێن بورى دا بایكوتا كومبونێن جڤاتا هاریكاریا عه‌ره‌بى كربو ئه‌ڤه‌ ئێكه‌م جاره‌ پشتى دانانا دورپێچێ لسه‌ر قه‌ته‌ر دناڤه‌راستا سالا دوهزارو هه‌ڤدێ شێخ ته‌میم بن حه‌مه‌د ئال سانى ئه‌میرێ وى وه‌لاتى سه‌ره‌دانا سعودیێ بكه‌ت . سعودیه‌ وبه‌حرێن وئیمارات ومیسر ل حوزه‌یرانا دوهزاروهه‌ڤدێ سنورێن ئه‌سمانى وهشكاتیى وده‌ریایی به‌رامبه‌ر قه‌ته‌رێ گرتن ووه‌لاتیێن قه‌ته‌رى ل وه‌لاتێن خو ده‌رئێخستن وسێزده‌ داخوازى ئێخستنه‌ به‌رامبه‌ر ده‌وحه‌ ژوان ژى گرتنا كه‌نالێ ئه‌لجه‌زیره‌ وهشككرنا هاریكاریا دارایى بو تیرورێ دگه‌ل گرتنا بنگه‌هێ سه‌ربازیێ توركیا ل قه‌ته‌رێ . هه‌تا نوكه‌ قه‌ته‌رێ رانه‌گه‌هاندیه‌ كو دێ چ ژوان داخوازیان بجهئینیت یان نه‌ هه‌روه‌سا هه‌ر ئێك ژ قه‌ته‌ر ومیسر وئیمارت وبه‌حرێن هه‌تا نوكه‌ ئینیه‌تا خو بو ڤه‌كرنا سنورێن خو به‌رامبه‌ر قه‌ته‌ر دیارنه‌كریه‌