نێچیرڤان بارزانى سهروكێ ههرێما كوردستانێ پشكدارى دكونفرانسێ ئێكرێزى ودستورى كر كو ژلایێ زانكویا كوردستان ههولێرڤه هاتیه سازكرن وتێدا سهروكێ ههرێمێ سهبارهت پرسا ئێكرێزى ودستورى گوت ئهو تشتێ ئهم ههردهم شانازیێ پێ دكهین دروشمێ پێكڤه ژیانێ یه ودڤێت پشتراستیا وێ پێكڤه ژیانێ ب ههمى پێكهاتێن جودا یێن ههرێما كوردستانێ بهێته دان ئهڤه ژى دێ ب رێكا دستورهكى بیت كو مافێ ههمى پێكهات ولایهنان تێدا بهرجهستهبیت . گوت ژى دستور بو ئێك حزب یان نهتهوه یان پێكهاتهكا دیاركرى نینه بهلكو دڤێت دستور ببیته بنهمایهك كو ههمى رهنگێن ههرێما كوردستانێ ب ئێكسانى بخوڤه بگریت . ونوكه پێنگاڤان بهرف نڤیسینا وى دستورى دهاڤێژین ومه دڤێت ئهو دستور ببیته نمونهیهكا پشتراستیێ بو ههمى لایهكى . سهبارهت ب ئێكرێزیێ ژى نێچیرڤان بارزانى گوت مه وهك حزب جوداهیهكا مهزن یاههى بهلێ مه پێناسهیهك دڤێت كو ههمى پێكهات لبن خیڤهتاوى كومببن وكهس نهبێژیت ئهڤه پارتی یه وئهڤه ئێكهتى یه یان پێكهاتهكا ئاینى یه بهلكو مهدڤێت ب رێكا وێ پێناسێ ههمى كهس ئهرك ومافێ خو دڤى وهلاتى دا بزانیت وههست ب وهلاتیبونا خو بكهت . ههر وهسا گوت ئهو بنهمایێ ههتا نوكه پارێزگارى ل ههرێما كوردستانێ كرى ئهو پێكڤهبونهبوو كو بو دهمێ چهندین سالایه پێڤه پابهندبوین وگرنگترین نمونه ژى ئهو ئێكرێزیه بو كو دشهرێ داعش دا مه پێكڤه دیاركر كو ههمى لایهن دهست دناف دهست روى ب روى دژواریێ بوین . سهبارهت پهیوهندیێن ههولێر وبهغدا پشتى سالا 2003 گوت ئهگهر ئهم بهرێخوبدهینه پهیوهندیێن ههولێر وبهغدا پشتى سالا 2003 وئهگهر بپرسین ئایا ههتا نوكه بهغدا مافێن ههرێما كوردستانێ داینه . بێگومان بهرسڤ دێ نهخیربیت . وئهگه ژ وهلاتیان ژى بپرسین ئایا ههست ب پشتراستیێ دچوارچوڤێ عیراقێ دا دكهن گومان تێدا نینه كو بهرسڤا ڤێ ژى ههر نهخیره . وئهگهر پسیارا وێ چهندێ ژى بكهین ئایا مه مفا ژ ژێكڤهبونێ دیتیه ئهڤهژى ههر نهخێره . ههتا نوكه بهغدا پابهند نهبویه ب وان خالێن دستورى یێن پهیوهندى ب ههرێما كوردستانێ ڤه ههى . لهوا دڤێت ژنوكه وێڤه ڤان دهستكهفتان بكهینه بنهمایێ پاشهروژا خو كو ب ئێكرێزیێ دێ بدهست مهڤه هێن . سهروكێ ههرێمێ گوت ژى قوناغهكا ههستیار لپێش مهیه ئهوژى ههلبژارتنێن عیراقێ یه ودڤێت ئهم ههمى ب ئێك دهنگ پشكداریێ تێدا بكهین داكو وێ قوناغا سهخت دهربازبكهین ودهستكهفتێن زێدهتر بوههرێما كوردستانێ بدهستڤهبینین
