سه‌رۆكێ هه‌رێما كوردستانێ هه‌لویستێ هێزێن سیاسیێن سه‌ره‌كی یێن عیراقێ ل سالا 2020ێ دگه‌ل هه‌رێما كوردستانێ ب زۆر سته‌مكارانه ب ناڤ كر و راگه‌هاند، مانا شاندێ كوردستانێ بۆ زێده‌تر ژ دوو حه‌فتیان ل به‌غدا نیازپاكی بوو، به‌لێ ب مخابنی ڤه هه‌تا نوكه به‌رسڤه‌كا ب كریاری ژ لایێ حكومه‌تا عیراقا فیدرال نه‌بوویه.
نێچیرڤان بارزانی، سەرۆکێ هەرێما کوردستانێ، د په‌یامه‌كا پیرۆزباهیێ دا ب هه‌لكه‌فتا هاتنا سالا نوى یا زایینى 2021ێ، پیرۆزباهیێ ل بنه‌مالێن سه‌ربلندێن شه‌هیدان و گه‌لێ عیراقێ و نوینه‌رێن وه‌لاتان ل كوردستانێ و عیراقێ و ل جیهانێ كر، هیڤی ژی خواستن سالا نوى كوردستان و عیراق و هه‌مى مرۆڤایه‌تی ژ نه‌خۆشێن دژوارێن سالا 2020ێ و ڤایرۆسێ كۆرۆنایێ ده‌رباز ببن و ساله‌كا پری ئارامی و خۆشی و سه‌قامگیری بیت، جاره‌كا دی ژی ژیان ئاسایی ببیته ڤه.
ل دۆر بڕینا مووچه و بودجا هه‌رێمێ ژ لایێ به‌غدا ڤه نیچیرڤان بارزانی گۆت: حكومه‌تا عیراقێ دڤێت شایسته‌یێن دارایی یێن سالا 2020ێ یێن هه‌رێما كوردستانێ و ل دویڤ رێككه‌فتنا به‌ری نوكه قه‌ربوو بكه‌ت، هه‌روه‌سا پێدڤی بوو سه‌رۆك وه‌زیرێن عیراقێ و حكومه‌تا فیدرال و هه‌می ده‌زگه‌هێن فه‌رمی یێن ده‌وله‌تا عیراقێ، ئه‌و نه داد په‌روه‌ریا هه‌مبه‌ری فه‌رمانبه‌ر و مووچه‌خوران و خه‌لكێ هه‌رێما كوردستانێ قه‌بویل نه‌كه‌ن.
سەرۆکێ هەرێما کوردستانێ،ل دۆر ره‌وشا ناڤخو‌یا هه‌رێما كوردستانێ ژی گۆت: ب مخابنی ڤه ناكوكیێن سیاسی یێن د ناڤبه‌را هێزولایه‌نێن سیاسی دا به‌رده‌وامه، ره‌وشا ژیان و ده‌رونێ خه‌لكێ كوردستانێ ب شه‌ره‌كێ ئاست نزمێ سوشیال میدیایێ خرابتر لێكرییه و زۆركرنا ئه‌وێ جوداهیا سیاسی، دێ بیته ئه‌گه‌رێ هندێ كو هێزێن سیاسیێن هه‌رێما كوردستانێ زۆر لاواز بكه‌ت.
