مه‌سرور بارزانى سه‌روكێ حكومه‌تا هه‌رێما كوردستانێ راگه‌هاند: گومان تێدا نینه هێرشێن مووشه‌كى یێن لسه‌ر بنگه‌هێ له‌شكرى یێ ئه‌مریكا ل فروكخانا ده‌وله‌تى یا هه‌ولێرێ هێرشه‌كا تیرورستى بوو.
ئه‌ڤ گوتنێن مه‌سرور بارزانى دچارچوڤێ چاڤپێكه‌فتنه‌كێ دا دگه‌ل ئاژانسا فرانس 24 هاتینه و گوت: ئه‌و هێرشێن شه‌ڤا 15 ێ ڤێ هه‌یڤێ لسه‌ر بنگه‌هێ ئه‌سمانى یێن هێزێن ئه‌مریكا ل فروكخانا ده‌وله‌تى یا هه‌ولێرێ هاتینه كرن، كو تێدا ژماره‌كا كه‌سان شه‌هید و بریندار بوون، گومان تێدا نینه كو هێرشه‌كا تیرورستى بوو و گوت ژى: ڤه‌كولینێن لدور وان هێرشان پێنگاڤێن باش برینه و د پێزانینێن ده‌ستپێكى دا ده‌ركه‌فتیه، كو چ لایه‌نه‌ك ل پشت ئه‌نجامدانا وان هێرشان بوویه ، بێى كو ناسناما وان بهێته ئاشكرا كرن.
سه‌روكێ حكومه‌تا هه‌رێما كوردستانێ ئاماژه ب وێ چه‌ندێ ژى دا، تیرورستێن داعش گه‌فێن به‌رده‌وام ل ده‌ڤه‌رێ دروستكرینه و گوت: داعش مژویلى خو رێكخستنێ یه.
مه‌سرور بارزانى گوت ژى: تیرورستێن داعش مفا ژ وێ ڤالاهیا ئه‌منى وه‌رگرتیه، كو ل ده‌ڤه‌رێن كوردستانى یێن ده‌رڤه‌یى ئیدارا هه‌رێما كوردستانێ دروست بووى و شیاینه چه‌كدارێن زێده‌تر ببه‌نه ناڤ رێزێن خو و هه‌تا نوكه چه‌ندین كریار ل دژى هێزێن ئه‌منى یێن عیراقێ ئه‌نجام داینه، د هنده‌ك حاله‌تان دا وه‌لاتیێن سڤیل ژى كرینه ئارمانج، ژبه‌ر وێ چه‌ندێ ژى هه‌تا نوكه داعش كێشه‌یه‌كا سه‌ره‌كى یه.
مه‌سرور بارزانى دووپات ژى كر، پێدڤیه جڤاكێ ده‌وله‌تى ب هویرى چاڤدێریا چالاكى و به‌ره‌ف پێشچوونێن داعش بكه‌ت.
هه‌ر دچارچوڤێ چاڤپێكه‌فتنێ دا مه‌سرور بارزانى به‌حسێ وێ چه‌ندێ ژى كر، پارتا كاركه‌رێن كوردستانێ په‌كه‌كه به‌رپرسه ژ هاتنا هێزێن توركیا بو ده‌ڤه‌رێ و گوت: پێدڤییه چاره‌سه‌ریه‌كا ئاشتیانه بو وێ كێشێ بهێته دیتن.
سه‌باره‌ت سهرهدانا پاپایێ ڤاتیكان ژى بو هه‌رێما كوردستانێ، كو بریاره د هه‌ڤتیا بهێت دا بهێته‌ئه‌نجام دان، مه‌سرور بارزانى ئه‌و سه‌ره‌دان ب دیروكى وه‌سفكر و گوت: ئه‌و سهرهدانا پاپای رێزگرتنه‌كه نه بتنێ بو مه‌سیحیێن ده‌ڤه‌رێ، به‌لكو بو پێكڤه ژیانا ئاشتیانه ل هه‌رێما كوردستانێ. مه‌سرور بارزانى هیڤى خواست ئه‌و سهرهدانا پاپا فرانسیس ببیته ئه‌گه‌رێ پشته‌ڤانیه‌كا زێده‌تر یا ده‌وله‌تى بو ئاوارێن نافخو.
