سەرۆکێ حکومەتا ھەرێما کوردستانێ ئەڤرۆ رۆژا چارشەمبی د گەل قونسل و ھنارتیێن دبلۆماسیێن وەلاتان ل ھەرێما کوردستانێ کۆم بوو و رەوشا ھەرێمێ و چاکسازییێن حکومەتێ و پەیوەندیێن ھەولێرێ و بەغدایێ گەنگەشە کرن.
مەسروور بارزانی د کۆمبوونا خودا د گەل قونسل و ھنارتیێن دبلۆماسیێن وەلاتان ئاماژە ب وێ چەندێ کر، ئەوان بەردەوام کار کرییە کو باشترین پەیوەندی د گەل حکومەتا فیدرال ھەبن و ھەمی ئاریشان ب رەتگەکێ بنەرەتی و ل سەر بنەمایێ دستوری چارە بکەن، بۆ وێ چەندێ ژی ھەمی پێگیریێن خو بجھئیناینە ب ئاراستەیا گەھشتن ب رێککەفتنەکێ کو د بەرژەوەندا وەلاتیێن عیراقێ دا بیت.
مەسروور بارزانی، سەرۆکێ حکومەتا ھەرێمێ دوپات ژی کر، کو پیدڤییە پرسا مووچەی ژ ململانێن سیاسی دویر بکەڤیت و نابیت مووچە ببیتە کارتەکا فشارێ ل دژی ھەرێما کوردستانێ و وەکو سیاسەتا برسیکرنێ ل دژی فەرمانبەرێن ھەرێمێ بھێتە بکارئینان.
مەسروور بارزانی ئاماژە ب کارناما حکومەتا ھەرێمی کر بۆ ھەموجۆرکرنا ئابووری و زێدەکرنا ژێدەرێن داھاتی و کێمکرنا خەرجییان و رێکخستنا باجێ و ئاسانکارییان بۆ وەبەرھێنەرێن ناڤخوە بیانی و گۆت: پلانەک پێخەمەت دابینکرنا مووچەیێن فەرمانبەرێن ھەرێمێ دارێژتیە.
مەسروور بارزانی، سەرۆکێ حکومەتا ھەرێمێ دوپات ژی کر، ھەرێما کوردستانێ فاکتەرەکێ گرنگێ سەقامگیرییا دەڤەرێ یە و دخوازن پەیوەندیێن دۆستانە د گەل وەلاتێن جیران بتایبەتی و د گەل جڤاکا ناڤدەولەتی ب گشتی پێشڤە ببەن، ئاماژە ژی ب گرنگییا بەردەوامبوونا ھاریکاری و ھەماھەنگییا ناڤدەولەتی د گەل ھەرێما کوردستانێ بۆ بەرھەنگاربوونا گەفێن تیرۆرێ کر.
