وه‌زاره‌تا كوچ و كوچبه‌رێن عێراقێ راگه‌هاند ، سێ هزار و دوو سه‌د و شێست و ئێك په‌نابه‌رێن دى كو ئاكنجیێن مویسلن زڤرینه سه‌رمالێن خو ئه‌ڤه‌ژى پشتى گرتنا كه‌مپا دوێ یا په‌نابه‌ران ل پارێزگه‌ها سه‌لاحه‌ددین
عه‌لى عه‌باس رێڤه‌به‌رێ گشتى یێ كاروبارێن په‌نابه‌ران ل وه‌زاره‌تا كوچ و كوچبه‌ران ب روژنامێن عێراقێ راگه‌هاند ، د چارچوڤێ پلانا وه‌زاره‌تێ بو دائێخستنا سه‌رجه‌م كه‌مپێن ئاواران ل پارێزگه‌هێن عێراقێ ، كه‌مپا سه‌لامیه وه‌كو كه‌مپا دوێ یا په‌نابه‌ران ل پارێزگه‌ها سه‌لاحه‌ددین هاته گرتن و هه‌مى ئه‌و خێزانێن د ناڤ كه‌مپێ دا زڤرینه سه‌ر مال و حالێن خو كو هژمارا وان شه‌ش سه‌د و نوت و چوار خێزان بوون و ژمارا ئاواران ژى سێ هزار و دوو سه‌د و شێست و ئێك كه‌س بوون كو هه‌مى ئاكنجیێن سه‌نته‌رێ پارێزگه‌ها مویسلن
رێڤه‌به‌رێ گشتى یێ كاروبارێن په‌نابه‌ران گوت ژى ، به‌رى نوكه سه‌رجه‌م كه‌مپێن پارێزگه‌ها نه‌ینه‌وا كو پێكهاتبون ژ كه‌مپا به‌عاج و ره‌بیعه و ته‌له‌عفر ته‌ل عه‌بته و زومار و قه‌یره‌وان هاتینه گرتن و په‌نابه‌ر زڤرینه سه‌ر مال و حالێن خو ، نوكه ژى بتنێ كه‌مپێن هه‌رێما كوردستانێ ماینه بو هندێ هه‌مى ئاوارێن عێراقێ ب زڤرنه سه‌ر جهـ و مالێن خو و هه‌مى كه‌مپ هاتنه گرتن
دوپات ژى كر ، زڤراندنا ئاواران ب هه‌ماهه‌نگى دگه‌ل ده‌زگه‌هێن ئه‌منى و ئیداریێن خوجهێن وان ده‌ڤه‌ران بوو و هه‌ر خێزانه‌كێ ژى كوژمه‌كێ پاره‌ى وه‌رگریته و دده‌مێ زڤرینێ دا پێدڤیێن سه‌ره‌كى بو ساله‌كێ وه‌رگرتینه
