ئهڤرو مهسروور بارزانى سهرۆكێ حكومهتا ههرێما كوردستانێ پێشوازى ل جنرال ریچارد بێل جێگرێ فهرماندێ گشتیێ هێزێن ههڤپهیمانان ل عیراقێ و سوریێ كر.
د دیدارێ دا كو قوباد تالهبانى جێگرى سهرۆكێ حكومهتێ یێ ئاماده بوو، دوماهیك گوهۆرین و پێشهاتێن عیراقێ و سوریێ گهنگهشه كرن .
جێگرێ گشتیێ هێزێن ههڤپهیمانان ل عیراقێ و سوریێ، قههرهمانی و قوربانیێن هێزێن پێشمهرگهى و چاكسازیێن حكومهتا ههرێما كوردستانێ ب تایبهتى یێن وهزارهتا پێشمهرگهى بلند نرخاندن، و دوپاتى ل گرنگى یا بهردهوام بوونا هاریكاریان بو پێشمهرگهى و ههماههنگى یا ئێمناهیێ دگهل لهشكهرێ عیراقێ كر بۆ بهرهنگاربوونا هێرشێن تیرورستێن داعش، د ڤى بیاڤى دا كاركرنا سهنتهرێن ههماههنگیێن ئێمناهیێ یێن ههڤپشك ل دهڤهرێن كوردستانى ب پێنگاڤهكا ئهرێنى دانا .
سهرۆكێ حكومهتێ سوپاسیا پشتهڤانى و هاریكاریێن هێزێن ههڤپهیمانان كر و دیاركر بۆ تێك شكاندنا داعش و تیرورێ ب گشتى، پێدڤیه ئهگهر و فاكتهرێن سهرهلدانا تیرورێ بهێنه بن بركرن، و ئاماژه ب گرنگیا پهسهندكرنا پروژه قانوونا تایبهت ب تاوانبارێن داعش كر كو ژلایێ جڤاتا وهزیرێن ههرێما كوردستانێ هاتیه ئامادهكرن، و دێ بیته پێنگاڤهك بۆ سزادانا تیرورستێن داعش وپهیدابوونا دادپهروهریێ و قهرهبووكرنا قوربانیان .