ئه‌ڤرو مه‌سرور بارزانى سه‌روكێ حكومه‌تا هه‌رێما كوردستانێ سه‌رپه‌رشتیا كومبونه‌كا تایبه‌ت بو ئاماده‌كاریێن پروژێ قانونا بودجا هه‌رێما كوردستانێ بو سالا 2021 ێ كر
دڤێ كومبونێ دا كو قوباد تا‌له‌بانى جێگرێ سه‌روكێ حكومه‌تێ ئاماده‌ببوو، دانوستاندن سه‌باره‌ت ره‌وشا دارایى یا هه‌رێمێ و ئاماده‌كاریێن پروژێ قانونا بودجا هه‌رێما كوردستانێ بو سالا 2021 ێ و داتایێن خه‌رجى و داهاتیێ ته‌خمینكرى یێن وه‌زاره‌تان هاته‌كرن، هه‌روه‌سا دووپاتى ل سه‌ر وێ چه‌ندێ كر كو دئاماده‌كرنا پروژێ قانونا بودجێ دا پێدڤیه هه‌مى بابه‌تێن دارایى به‌رچاڤ بهێنه وه‌رگرتن و بودجه‌‌كا واقعى و شه‌فاف بهێته به‌رهه‌ڤكرن و پشت به‌ستن لسه‌ر داتا و داهاتێ نه‌فتێ و داهاتێن نه نه‌فتى و و خه‌رجیێن راسته‌قینه بهێته‌كرن
هه‌ر دڤێ كومبونێ دا دویماهیك پێشهاتێن پروژه قانونا بودجا حكومه‌تا فیدرال بو سالا 2021 ێ هاتنه به‌حسكرن كو بریاره ل حه‌فتیا بهێت ل جڤاتا نوینه‌رێن عێراقێ ده‌نگ ل سه‌ر بهێته دان
سه‌روكێ حكومه‌تا هه‌رێما كوردستانێ ته‌ئكید ل سه‌ر هه‌لویستێ نه گهورێ هه‌رێما كوردستانێ كر بو چاره‌سه‌ركرنا كێشێن هه‌لاویستى یێن بنه‌ره‌تى یێن دناڤبه‌را هه‌رێما كوردستانێ و حكومه‌تا فیدرال دا ژ وانا ژى بابه‌تێ شایستێن دارایى یێن هه‌رێمێ ل سه‌ر بنه‌مایێن ده‌ستورى
سه‌روكێ حكومه‌تێ هیڤیى خواست كو لایه‌نێن عێراقى پێشوازى و پشته‌ڤانیێ ل داخازیا سه‌روك وه‌زیرێن حكومه‌تا فیدرال مسته‌فا كازمى بكه‌ن ژ پێخه‌مه‌ت چاره‌سه‌ركرنا كێشێن دناڤبه‌را هه‌رێما كوردستانێ و حكومه‌تا فیدارل دا
