ئه‌ڤرو بسه‌رپه‌رشتیا مه‌سرور بارزانى سه‌روكێ حكومه‌تا هه‌رێما كوردستانێ وب ئاماده‌بونا قوباد تاله‌بانى جێگرێ سه‌روكێ حكومه‌تێ جڤاتا بلندا وه‌به‌رهێنانێ كومبونا خو یا ئاسایى گرێدا . دكومبونێ دا پێشڤه‌برن وگه‌شه‌پێدانا وه‌به‌رهێنانێ ونه‌هێلانا روتینێ ودروستكرنا سایته‌كێ تایبه‌ت بو بسا‌ناهیكرنا كارێ وه‌به‌رهێنه‌ران وده‌ستپێكرنا پروژێن راوه‌ستیاى ونه تمامكرى ودانانا میكانزمه‌كێ بو چه‌وانیا گوهورینا سیكته‌رێن وه‌به‌رهێنانێ هاتنه گه‌نگه‌شه‌كرن .
سه‌روكێ حكومه‌تێ ئاماژه ب وێ چه‌ندێ دا كو كابینا نه‌هێ یا حكومه‌تێ هه‌ر ژده‌ستپێكا ده‌ستبكاربونا خو كاركریه ژپێخه‌مه‌ت به‌رفره‌هكرنا پروسا وه‌به‌رهێنانا نافخویى وبیانى ب رێكا دارشتن وئیمزاكرنا قانونێن وه‌به‌رهێنانێ و گرنگى دان ب خزمه‌تگوزاریێن ئه‌لكترونى وپه‌یره‌وكرنا سیسته‌مێ ئێك په‌نجه‌ره‌یى داكو پروسا وه‌به‌رهێنانێ بله‌زتر ول دویف پێدڤیێن هه‌رێما كوردستانێ بیت . دكومبونێ دا وپشتى دانوستاندنێ ولێك گوهورینا دیتن و بوچونان چه‌ندین بریار سه‌باره‌ت گه‌شه‌پێدانا وه‌به‌رهێنانێ ورێكخستنا پێدانا موله‌تا پروژێن وه‌به‌رهینانێ هاتنه دان
