محه‌مه‌دێ حاجى مه‌حموود سكرتێرێ حزبا سۆشیالستا دیموكراتا كوردستانێ د یادا چار سالییا دیاركرنا رۆژا ریفراندۆمێ دا راگه‌هاند: ئه‌و بریارا سه‌رۆكێ بارزانی دایى و لیژنا بلندا ریفراندۆمێ ب هه‌مى هێزێن سیاسی ڤه پشته‌ڤانى لێ كری، بریاره‌كه كو د دیرۆكا كه‌ڤن و نوى یا ملله‌تێ مه‌دا نه‌بوویه، گۆت ژى ئه‌وێن دژى ریفراندۆمێ راوه‌ستیاین د رۆژا ریفراندۆمێ دا تلێن خو بلندكرن و ب به‌لێ ده‌نگ ب سه‌ربه‌خۆیا كوردستانێ دان و نه‌شیان خۆ ل به‌ر ئیراده‌یا ملله‌تێ خو راگرن.
محه‌مه‌د حاجى مه‌حموود گۆت ژى، من رێزه‌كا تایبه‌ت بۆ ڤێ رۆژێ هه‌یه كو تێدا مه بریاره‌كا گرنگ و چاره‌نڤێسساز بۆ رۆژا 25ى ئیلۆنێ دیاركر.
ناڤبرى ئاماژه ب هندێ ژى كر، ریفراندۆم كارته‌كا زیندییه و وه‌كو تاپۆیه‌كا ره‌شه و داخازیا هه‌مى خه‌لكێ كوردستانێ یه، مه بۆ دۆست و دوژمنان سه‌لماند كو خه‌لكێ كوردستانێ چ دڤێت، ئه‌وێن به‌حسی دیموكراسیێ و مافێ مرۆڤى و مافێن نه‌ته‌وه و ئازادیێ دكرن، ل به‌رامبه‌ر كوردان بێ ده‌نگ و كه‌ڕ و لال بوون.
ل دویماهیا په‌یاما خو دا محه‌مه‌دێ حاجى مه‌حموود گۆت، ده‌مێ پرۆژه‌یه‌ك سه‌ردكه‌ڤیت گه‌له‌ك كه‌س خۆ ب خودانێ وێ ددانن، لێ ئه‌گه‌ر پێنگاڤه‌كێ گیرۆ بوو، زۆر كه‌س خو ژێ دده‌نه پاش، ئه‌و بریارا سه‌رۆك بارزانى دایى و لیژنا بلندا ریفراندۆمێ په‌سه‌ندكرى كو هیچ كه‌سه‌ك نه‌شیا ژێ دویر بكه‌ڤیت، د دیرۆكا كه‌ڤن و نوى یا ملله‌تێ مه دا بریاره‌كا وه‌سا گرنگ و ب سه‌نگ نه‌بوویه.
