خه‌دیجه عومه‌ر ئه‌نداما لیژنا قانونى ل په‌رله‌مانێ كوردستانێ گوت ، د خولا بورى یا په‌رله‌مانێ كوردستانێ دا لیژنه‌یه‌ك پێك هاتبوو و 71 ماده‌یێن دستورى نڤیسیبوون ، پێدڤییه دڤێ خولێ دا لیژنه‌كا دى پێك بهێت و بله‌ز كار بو نڤیسینا دستورى بكه‌ت چونكى گه‌له‌ك ده‌م لبه‌رده‌ست نه‌مایه ، و گوت وه‌كو فراكسیونا پارتى ئه‌م د رژدین لسه‌ر وێ چه‌ندێ كو هه‌رێم ببیته خۆدان دستور، چونكى دستور هه‌مى كیشه‌یان چاره‌سه‌ر دكه‌ت.
هه‌روه‌سا گوت ژ ئه‌گه‌رێ ژ كاركه‌فتنا په‌رله‌مانى ل خولا بوورى و هه‌بوونا ئالووزیان لیژنێ كارێ خو ته‌مام نه‌كر و دڤێ خولا په‌رله‌مانى دا بزاڤێن زێده بو د‌ستورێ هه‌رێما كوردستانێ كرینه و هه‌مى لایه‌ن درازینه بو هندێ هه‌رێما كوردستانێ ببیته خودان دستور و پشته‌ڤانییێ لێ دكه‌ن.
ناڤبرییێ گوت ، هه‌مى لایه‌ن پێ دخوشن كو هه‌رێم دڤێ خولێ دا ببیته خودان دستور چونكى هه‌بوونا دستورى یا گرنگه بو هه‌رێما كوردستانێ و كێشێن هه‌رێمێ دێ چاره‌سه‌ر كه‌ت ، ژلایێ قانونى ڤه كێشێن دناڤبه‌را هه‌رێما كوردستانێ و به‌غدا و هه‌مى كێشێن نافخۆ ژى ب رێكا دستورى دێ هێنه چاره‌كرن و دێ ده‌ستهه‌لاتێن حكومه‌ت و دادوه‌رییێ و هه‌مى ده‌ستهه‌لاتێن دى دیار كه‌ت ، ژبه‌ر ڤێ چه‌ندێ مه گه‌له‌ك كێشه هه‌نه ئه‌گه‌ر دستور هه‌با دا سه‌رجه‌م كێشه‌یێن مه هێنه چاره‌سه‌ركرن.
