ئه‌ڤرو ل فروكخانا هه‌ولێرێ یا ده‌وله‌تى نێچیرڤان بارزانى سه‌روكێ هه‌رێما كوردستانێ پێشوازى ل پاپا فرانسیس پاپایێ ڤاتیكان كر.
د كومبونه‌كێ دا كو مه‌سرور بارزانى سه‌روك وه‌زیرێن حكومه‌تا هه‌رێمێ و قوباد ته‌له‌بانى جێگرێ سه‌روك وه‌زیران و مونا قه‌هوه‌چى سكرتێرا په‌رله‌مانێ كوردستانێ ئاماده‌ببون ، نێچیرڤان بارزانى ب خێرهاتنا قه‌داسه‌تا پاپاى كر و گوت ، ب ناڤێ هه‌مى پێكهاتێن كوردستانێ زور ب گه‌رمى ب خێرهاتنا قه‌داسه‌تا هه‌وه دكه‌ین ، سه‌ره‌دانا هه‌وه رویدانه‌كا مه‌زنا مێژوییه و جهێ خوشحالیا مه‌یه و شانازیه بو هه‌مى گه‌لێ كوردستانێ.
هه‌روه‌سا نێچیرڤان بارزانى ڕاگه‌هاند مه باوه‌رییه‌كا تمام ب ئازادییا ئاینى و پێكڤه‌ژیانێ هه‌یه ، لێبورین و پێكڤه‌ژیان دناڤبه‌را پێكهاته‌یاندا دا، ناسنامه و كلتوره‌كێ دێرینێ كوردستانێیه ، ب هه‌مى ره‌نگا دێ پارێزگارییێ ل كلتورى كه‌ین، ئه‌م هه‌رده‌م دگه‌ل ئاشتى و دانوستاندنێینه، تیرورێ و توندره‌وییێ ڕه‌تكه‌ین ، چ جارا رێكێ ناده‌ین چ پێكهاتێن ئاینى یان نه‌ته‌وه‌یى ل هه‌رێما كوردستانێ ببنه قوربانییێن تیرور و توندره‌وییێ.
ژلایه‌كێ دى ڤه نێچیرڤان بارزانى دووپاتكر كو مه‌سیحى پێكهاته‌كێ ره‌سه‌ن و سه‌ره‌كى نه ل كوردستانێ جڤاكه‌كێ ئاشتىخوازن و روله‌كێ مه‌زن د ئاڤاكرن و پێشئێخستن و پاراستنا وه‌لاتیدا گێرایه و دگێرن ، و چ یا ژده‌ستێ مه بهێت بو پاراستنا وان ئه‌م خه‌مسارییێ ناكه‌ین.
