فروكێن توركیا ده‌ڤه‌رێن سنورێ سێ ناحیان ل سنورێ پارێزگه‌ها دهوكێ بومبه‌باران كرن . ل ده‌مژمێر 12یێ نیڤرو چه‌ند ده‌ڤه‌رێن نێزیك چیایێ گاره‌ى بومبه‌بارانكرن ، رێڤه‌به‌رێ ناحیا چه‌مانكێ گوت ، وه‌لاتیه‌ك ئه‌ڤه سێ روژه یێ بێ سه‌رشوینه و چاره‌نڤیسێ وى یێ ئاشكرا نینه
رێڤه‌به‌رێ ناحیا دینارته یا سه‌ر ب قه‌زا ئاكرێ ڤه راگه‌هاند ، ئه‌ڤرو روژا ئه‌ینى ده‌مژمێر 12 ب به‌رده‌وامى ده‌نگێ فروكان ل ئاسمانێ قه‌زا ئاكرێ و ئامێدیێ دهات
دیسان ده‌مژمێر سێ فروكێن توركیا ب دژوارى گه‌لیێ زه‌نته ل سنورێ ناحیا دینارتێ بومبه‌بارانكر ، و لده‌مژمێر 4 و ده‌هـ خوله‌ك چیایێ خێرێ ل سنورێ ناحیا قه‌سروك و قه‌زا شێخان بومبه‌بارانكر ، هه‌ڤده‌م سێ روژه ده‌نگێ فروكان به‌رده‌وام ل سنورێ قه‌زا ئامێدیێ ب تایبه‌ت ده‌ڤه‌رێن نێزیك زنجیرا چیایێ گاره‌ى به‌رده‌وام دهێت و به‌رده‌وام ده‌نگێ بومبه‌بارانكرنێ هه‌یه
میدیایێن نێزیك په‌كه‌كێ ئاماژه ب وێ چه‌ندێ دا ئه‌ڤرو ئێڤارى شه‌ره‌كێ دژوار ل بنارێ چیایێ گاره‌ى دناڤبه‌را په‌كه‌كێ و له‌شكه‌رێ توركیا رویدا ، گوت ژى ئه‌ڤه سێ روژه توركیا دڤێت ب رێكا هه‌لیكوپترا له‌شكه‌رى ل چیایێ گاره‌ى بنه‌جهبكه‌ت به‌لێ گه‌ریلایێن په‌كه‌كێ رێگریێ لێدكه‌ن
هه‌ر ئه‌ڤرو وه‌زاره‌تا به‌ره‌ڤانیا توركیا د هژمارا خو یا فه‌رمى دا ل تویته‌رى ڤیدویا له‌شكه‌رێن توركى ب رێكا فروكان كو ل چیایێ گاره‌ى هاتبونه به‌ردان به‌لاڤكر، میدیایێن په‌كه‌كێ گوت رێكێ ناده‌ین فروكێن توركیا له‌شكه‌رێ خو ل چیایێ گاره‌ى به‌رده‌ن
وه‌زاره‌تا به‌ره‌ڤانیا توركیا گوت ، ئوپراسیونا چه‌نگێ ئه‌لهوى 2 ل چیایێ گاره‌ى ل هه‌رێما كوردستانێ ل روژا 10 شوباتێ 2021 ێ ل دژى تیروریستان ب وى ره‌نگێ پلان بو هاتیه دارشتن یا به‌رده‌وامه
سه‌ربه‌ست له‌زگین بریكارێ وه‌زاره‌تا پێشمه‌رگه‌ى راگه‌هاند ، ئوپراسیونا چه‌نگێ ئه‌لهوى 2 ل چیایێ گاره‌ى ل روژا 10 شوباتا سالا 2021 لدویڤ پێزانیێن مه بتنێ ل روژا 10 ڤێ هه‌یڤێ بو چه‌ند ده‌مژمێران له‌شكه‌رێن توركى ب رێكا فروكان ل چیایێ گاره هاتبونه به‌ردان به‌لێ نوكه ل سه‌ر ئه‌ردى نه‌ماینه
