شاندێ دانوستانكارێ هه‌رێما كوردستانێ سوبه‌هى دێ سه‌ره‌دانا به‌غدا كه‌ت و جاره‌كا دی دگه‌ل لیژنا دارایی و لایه‌نێن دیێن عیراقێ دێ كۆم بیت بۆ دان و ستاندنێ ل سه‌ر پشكا هه‌رێمێ د بودجا سالا 2021ێ دا.
عه‌بدولحه‌كیم خسرۆ، به‌رپرسێ ئۆفیسا هه‌ماهه‌نگى و پێداچوونێ ل هه‌رێما كوردستانێ راگه‌هاند، سوبه‌هى شاندێ هه‌رێمێ ب مه‌ره‌ما دانوستاندنان ل گه‌ل حكومه‌تا به‌غدا لدور بودجێ و مافێن دارایێن هه‌رێما كوردستانێ ب سه‌رۆكایه‌تیا قوباد تاله‌بانی، جێگرێ سه‌رۆكوه‌زیران دێ چیته به‌غدا.
گۆت ژی: گه‌نگه‌شه د به‌رده‌وامن بو هندێ كو بگه‌هینه رێككه‌فتنه‌كێ ل سه‌ر بنه‌مایێ د‌ستوری كو مافێن دارایێن هه‌رێما كوردستانێ دابین بكه‌ت.
د دوماهی سه‌ره‌دانا شاندێ هه‌رێما كوردستانێ بۆ به‌غدا دگه‌ل لیژنا دارایى یا په‌رله‌مانێ عیراقێ كۆم ببوو، و كۆمبوون ژی یا تایبه‌ت بوو ب پشكا هه‌رێما كوردستانێ و دوسه‌یێن په‌ترۆلێ د پرۆژه قانونا بودجێدا.
په‌رله‌مانتارێن كورد ل په‌رله‌مانێ عیراقێ، هۆشداریێ دده‌ن كو چاره‌سه‌رنه‌كرنا كێشا په‌ترۆلێ د چوارچووڤێ مافێن ده‌ستوریێن هه‌رێمێ دا، د پاشه‌رۆژێ دا دێ باجا وان یا مه‌زن بیت، ژبه‌ر وێ هندێ داخواز دكه‌ن هه‌رێما كوردستانێ ب راده‌ستكرنا په‌ترۆلێ به‌رامبه‌ری پشكا هه‌رێما كوردستانێ پێگیر بیت.
ماددێن 10 و 11 ژ پرۆژه‌قانوونا بودجا 2021ێ یا عیراقێ تایبه‌تن ب پشكا هه‌رێما كوردستانێ، هه‌ولێر یا پێگیره ب راده‌ستكرنا 250 هزار به‌رمیلێن په‌ترۆلێ رۆژانه و نیڤا داهاتى ژبلی په‌ترۆلێ د به‌رامبه‌ر دا پشكا هه‌رێمێ 12.67 ژ لایێ به‌غدا ڤه دێ هێته ره‌وانه‌كرن
