سه‌رۆك بارزانی بهه‌لكه‌فتا سالڤه‌گه‌را 30 سالییا سه‌رهلدانێ په‌یامه‌ك به‌لاڤكر و ئه‌ڤه ده‌قێ وێ یه:
بناڤێ خودێ مه‌زن و دلۆڤان
بهه‌لكه‌فتا 30 سالییا سه‌رهلدانا مه‌زنا گه‌لێ كوردستانێ پیرۆزباهییێ ل مالباتێن سه‌ربلندێن شه‌هیدان و پێشمه‌رگێن قه‌هره‌مان و هه‌مى نشتیمانپه‌روه‌ر و خه‌باتكه‌ر و ئازادیخوازان و هه‌مى ته‌خ و چین و وه‌لاتیێن كوردستانێ دكه‌م.
سه‌رهلدان، رازی نه‌بوون لسه‌ر بن ده‌ستی و داگیركاریێ بوو، د هه‌مان ده‌مدا پێنگاڤه‌كا مه‌زنا بزاڤا رزگاریخوازا كوردی بوو بۆ ده‌ستپێكا قوناغه‌كا گرنگ د خه‌باتا گه‌لێ وان دا، ئارمانجا سه‌رهلدانێ، ڤه‌گه‌راندنا ئاخ و مافان بوو بۆ گه‌لێ كورد، كو ده‌مه‌كێ درێژ بوو ب ئاگر و ئاسنی زۆرداری ل خه‌لكێ كوردستانێ دهاته كرن، سه‌رهلدان بۆ وێ چه‌ندێ بوو كو گه‌لێ كورد بشێت لسه‌ر ئاخا خو و دچارچۆڤێ پرۆسه‌یا دیموكراسی و دامه‌زراندنا دام و ده‌زگه‌هێن شه‌رعی و ب ئازادی ب مافێن خو بژیت.
دڤێ هه‌لكه‌فتا پیرۆزدا دووپات دكه‌ین، كو پێدڤییه ئارمانج و بهایێن سه‌رهلدانێ بۆ هه‌تا هه‌تایێ بلند و به‌رقه‌رار بن، ب چ ره‌نگه‌كێ نابیت ئارمانج و ده‌ستكه‌فتێن سه‌رهلدانێ بۆ لایه‌نه‌كێ دی ببه‌ن و د بابه‌تێن سنوردار دا بچویك بكه‌ن، گه‌لێ كوردستانێ خه‌بات كریه و خوینا خو رژتییه داكو ب سه‌ربلندی بژیت، هه‌ر كه‌س و لایه‌نێ بزاڤان دكه‌ت بها و ئارمانجێن سه‌رهلدانێ كێمبكه‌ت د راستیێ دا ئه‌و بێ پاكیێ ل به‌رامبه‌ر خوینا شه‌هیدان و ب ده‌هان سالێن خه‌بات و قوربانیدانا گه‌لێ كورد دكه‌ت، ل به‌رامبه‌ر ژی ب سه‌دان هزار رۆلێن كوردستانێ د ئاماده‌نه به‌ره‌ڤانیێ ژ به‌ها یێن بلندێن سه‌رهلدانێ بكه‌ن.
مسعود بارزانی
٥ێ ئادارا 2021ێ
