مه‌سرور بارزانى سه‌رۆكێ حكومه‌تا هه‌رێما كوردستانێ بهه‌لكه‌فتا سالڤه‌گه‌را 30 سالییا سه‌رهلدانا ئادارا سالا 1991ێ په‌یامه‌ك به‌لاڤكر ئه‌ڤه ده‌قێ وێ یه:
بهه‌لكه‌فتا 30 سالییا سه‌رهلدانا ئادارا سالا 1991 یا گه‌لێ كوردستانێ، گه‌رمترین پیرۆزباهییان ل خه‌لكێ كوردستانێ و بتایبه‌ت پێشمه‌رگێن قه‌هره‌مان و بنه‌مالێن سه‌ربلندێن شه‌هیدان دكه‌م.
سه‌رهلدانا ئادارا سالا 1991 ئێكه ژ سه‌روه‌ری یێن مه‌زنێن گه‌لێ كورد كو به‌رهه‌مێ ئێكرێزی و ئێكگرتنا هه‌مى چین و پێكهاته‌یێن گه‌لێ كوردستانێ و هێز و لایه‌نێن كوردستانی بوو، بێ ده‌نگ نه‌بوون به‌رامبه‌ر زوردارى و داگیركاری و بنده‌ستیێ بوو، سه‌رهلدان وه‌رچه‌رخانه‌كا دیرۆكی بوو د شۆره‌ش و به‌رخو‌دان و بزاڤا رزگاریخوازا گه‌لێ كوردستانێ دا كو به‌رهه‌مێ وێ دروستبوونا قه‌واره‌یێ فیدرالی یێ هه‌رێما كوردستانێ و سازیێن شه‌رعی و دستووری یێن هه‌رێمێ بوو كو پێدڤییه ئه‌ڤرۆ ژی هه‌ر تاكه‌كێ كورد و هه‌مى لایه‌ن و پێكهاته، ب ئێكرێزی و ئێكده‌نگ دووپاتییێ ل ده‌ستكه‌فتێن نشتیمانی و مافێن دستووری یێن گه‌لێ كوردستانێ بكه‌ن.
پێدڤییه بهایێ مه‌زنێ سه‌رهلدانێ، بنه‌مایێن پێكڤه‌ژیانا ئاشتییانه و گیانێ لێبۆرین و ئاشتیخواز و مرۆڤ دۆستییا گه‌لێ كورد بپارێزین و باشتر بكه‌ین.
بهه‌لكه‌فتا سه‌رهلدانێ، پێدڤییه بزاڤێن زێده‌تر ژبۆ پشته‌ڤانییا حكومه‌تا هه‌رێما كوردستانێ بكه‌ین داكو بشێت ب باشترین ره‌نگ كارنامه‌یا چاكسازییێ بجهبینیت و خزمه‌ته‌كا باشتر پێشكێشی هه‌مى خه‌لكێ كوردستانێ بكه‌ت و پێكڤه هه‌رێما كوردستانێ به‌ره‌ڤ قوناغه‌كا باشتر ببه‌ن. بلند و سه‌رفراز بیت سالڤه‌گه‌را سه‌رهلدانا ئادارا 1991
سه‌ربلندی بۆ شه‌هیدێن سه‌رهلدانێ و هه‌مى شه‌هیدێن كوردستانێ
مەسرور بارزانی
سەرۆکێ حکومەتا هەرێما کوردستانێ
5ێ ئادارا 2021ێ
