سهروك بارزانى ب ههلكهفتا جهژنا نهوروزێ پهیامهك بهلاڤكر ئهڤه ژى دهقێ وێ یه:
بناڤێ خودێ مهزن و دلوڤان
ب ههلكهفتا هاتنا جهژنا نهتهوهیى یا نهوروزێ پیروزباهیێ ل بنهمالێن سهربلندێن شههیدان و پێشمهرگێن قههرهمان و ههمى خهلكێ كوردستانێ دكهم. پیروزباهیێ ل ههمى گهلێ كورد ل پارچێن دى یێن كوردستانێ و سهرانسهری جیهانێ دكهم. پیروزباهیێ ل ههمى وان نهتهوان دكهم كو نهوروز پشكهكه ژ كلتور و داب و نهریتێن وان.
بو گهلێ كوردستانێ نهوروز ژبلى كو هاتنا بهارێ و نویبوونا سروشتى یه ، رامانا ئازادیخوازیێ و سهرهلدانێ دژى زوردارى یێ ددهت. كوردان د نهوروزێ دا سهرهلدان كریه بو وێ چهندێ ژبن دهستیێ رزگار ببن و ئازادیێ بدهستخوڤه بینن. روحا سهرهلدان و ئازادیخوازیا كوردان ل دهمهكێ درێژه ههبوویه و نوكه ژى ههر ههیه و هندى بندهستى و زوردارى ههبیت ههر دێ درێژى پێ هێته دان.
خهلكێ كوردستانێ باوهرى ب پێكڤه ژیانا نهتهوهیى و ئاینى و بیروبوچوونێن جودا ههیه و دڤى بیاڤی دا خودانا فهرههنگهكا دیروكى یا كویره، ب كریار بنهمایێن پێكڤه ژیانێ سهلماندینه و كار پێ كریه. دههمان دهم ژى دا گیانێ ئازادیخوازیێ و پێكڤهژیانا كوردان ههردهم دگهل ئاشتیخوازیێ دانه، خهلكێ كوردستانێ دڤێت ب رهنگهكێ ئاشتیانه چارهنڤیسێ خو دیار بكهت و ئاریشه برێكێن ئاشتیێ چارهسهر ببن و باوهرى ب شهر و توندوتیژیێ نینه. بهلێ دگهل وێ چهندێ ژى دا بن دهستى و زورداریێ ل چ لایهكێ قهبیل ناكهت ئهگهر كار گههشته وێ چهندێ زولم وتهعدا لێ بهێته كرن بهرهڤانیێ ل مافێن خو دكهت.
ههردهم مه پێخوشه و مه دڤێت ئاریشێن خو دگهل عیراقێ لسهر بنهمایێن شهراكهتێ چارهسهر بكهین. خهلكێ كوردستانێ لسهر بنهمایێن حهزا خو د عیراقێ دا شریكه، لادان ژ بنهمایێن ئێكهتیا حهزكرنێ و بكارئینانا زمانێ زورینه و كهمینه و كلتورێ خوسهپاندن و پشت گوهـ هاڤێتنێ د پشت راستین ئاریشه ناهێنه چارهسهركرن.
نهوروزا وه پیروزبیت و بمینن بخێر و خوشى
مهسعود بارزانى
29ێ رهشهممهیا 2721 كوردى
20ێ ئادارا 2021 زایینى
