ئه‌ڤرو ل سه‌لاحه‌ددین سه‌روك مه‌سعود بارزانى پێشوازى ل ستیك پاولو پیراس بالیوزێ دانیمارك ل عیراقێ كر .
ددیداره‌كێ دا بالیوزێ دانیمارك ل عیراقێ دلگرانیا خو بو هێرشا موشه‌كى یا شڤێدى ل سه‌ر باژێرێ هه‌ولێرێ دیاركر و رێز سوپاسى هه‌بون بو وێ سه‌قامگیرى و ئێمناهى و پێشكه‌فتنێ كو ل سالێن بورى ونوكه ل هه‌رێما كوردستانێ هاتیه پێش . بالیوزێ دانیمارك ل عیراقێ ئه‌و چه‌نده ژى به‌رچاڤكر وه‌لاتێ وى هه‌ڤپشكێ هه‌ڤپه‌یمانیا ده‌وله‌تى یا دژى تیرورێ یه وپشكداربوویه ل مه‌شق و راهێنانێن هێزێن عیراقى وهێزێن پێشمه‌رگێ كوردستانێ دا. ته‌ئكید ژى كر كو پێدڤى یه كێشێن دناڤبه‌را هه‌رێم وحكومه‌تا فیدرال ب رێكا دان و ستاندن وئاشتیێ بهێنه چاره‌سه‌ركرن .
سه‌روك بارزانى ئه‌و چه‌نده راگه‌هاند كو تێكشكاندنا تیرورێ بزاڤه‌كا هه‌مه‌لایه‌نى یه وپێدڤى ب فره ره‌هه‌ندیێ یه، راسته نوكه داعش ژلایێ له‌شكرى ڤه شكه‌ستیه به‌لێ ئه‌و بابه‌تێن بوینه ئه‌گه‌رێ سه‌رهلدان وبهێزبونا تیرورێ وه‌كى خو ماینه و نه هاتینه گوهارتن. سه‌باره‌ت كێشێن دناڤبه‌را حكومه‌تا هه‌رێمێ وحكومه‌تا فیدرال دا سه‌روك بارزانى دوپاتكر كو پێدڤى یه ئه‌و كێشه ب رێكا دان و ستاندن و دچوارچوڤێ دستورى دا بهێنه چاره‌سه‌ركرن . ره‌وشا سیاسى یا ده‌ڤه‌رێ وعیراقێ وهه‌لبژارتنێن داهاتى یێن عیراقێ ته‌وه‌ره‌كێ دیێ كومبونێ بو
