سه‌روك بارزانى و نوینه‌را نه‌ته‌وه‌یێن ئێكگرتى ل عیراقێ پێشهاتێن نوى گه‌نگه‌شه‌كرن

ئه‌ڤرو ل سه‌لاحه‌ددین سه‌روك مه‌سعود بارزانى پێشوازی ل جینین پلاسخارت هنارتییا تایبه‌تا سكرتێرێ گشتیێ رێكخراوا نه‌ته‌وه‌یێن ئێكگرتى ل عیراقێ كر .

 ددیداره‌كێ دا بیروبوچوون سه‌باره‌ت ره‌وشا سیاسى و پێشهاتێن عیراقێ و دانوستاندنێن دناڤبه‌را هه‌رێم و حكومه‌تا فیدرال دا، هه‌روه‌سا ئاسته‌نگێن به‌رامبه‌ر بجهئینانا رێككه‌فتنا ئاسایكرنا ره‌وشا شنگالێ گه‌نگه‌شه‌كرن . دڤێ روینشتنێ دا هنارتیا تایبه‌تا سكرتێرێ گشتیێ رێكخراوا نه‌ته‌وه‌یێن ئێكگرتى ل عیراقێ ته‌ئكید كر كو نه‌ته‌وه‌یێن ئێكگرتى حكومه‌تا عیراقێ و حكومه‌تا هه‌رێما كوردستانێ هاندده‌ت كو به‌رده‌وام بن لسه‌ر دیالوگێ و ره‌خساندنا كه‌شێ ئه‌رێنى بو سه‌رئێخستنا دانوستاندنان و گه‌هشتن ب چاره‌سه‌ریه‌كا گونجاى بو كێشێن دناڤبه‌را واندا . هه‌ر دكومبونێ دا سه‌روك بارزانى پشته‌ڤانییا خو بو دیالوگا به‌رده‌وام دناڤبه‌را حكومه‌تا هه‌رێمێ و حكومه‌تا عیراقا فیدرال  دچوارچوڤێ دستورى دا راگه‌هاند و دووپاتكر كو ئه‌گه‌ر ل سالێن بورى دستور وه‌كى خو هاتبا بجهئینان دا گه‌له‌ك ژڤان كێشه‌ و گرفتان چاره‌سه‌ربن كو نوكه‌ دناڤبه‌را هه‌ردوو لادا هه‌نه‌.