نێچیرڤان بارزانى سه‌روكێ هه‌رێما كوردستانێ په‌یامه‌ك به‌لاڤكر وب دژوارى هێرشا لسه‌ر هه‌ولێرێ ئیدانه‌كر و ئه‌ڤه ژى ده‌قێ په‌یاما وى یه :
هێرشا تیرورستیا شڤێدى كو ب موشه‌كان سه‌ر هه‌ولێرێ هاتیه‌كرن وبویه ئه‌گه‌رێ ژده‌ستدانا كه‌سه‌كى وبرینداربونا 9 كه‌سێن دى و ژماره‌یه‌ك ژ وان ئه‌مریكى بوینه ب دژوارى ئیدانه و شه‌رمزاردكه‌ین. ئه‌م سه‌ره‌خوشیێ ل كه‌س وكارێن وى قوربانى دكه‌ین وهیڤیا زوى ساخبونێ بو برینداران دكه‌ین. داخازێ ژ جڤاتا ئێمناهیا ده‌وله‌تى و نه‌ته‌وه‌یێن ئێكگرتى دكه‌ین مه‌ترسیا ڤێ هێرشێ ب گه‌له‌ك جددى وه‌رگرن وكار بكه‌ن بو رێگریكرنێ ل ڤان هێرشان بو سه‌ر خه‌لكێ هه‌رێما كوردستانێ ب رێكا هاندانا حكومه‌تا عیراقێ بو بجهئینانا دستورێ عیراقێ وب تایبه‌تى ماددێ 140 . داخواز ژ سه‌روك وه‌زیران وفه‌رماندێ گشتى یێ هێزێن چه‌كدارێن عیراقێ وفه‌رماندێ هێزێن هه‌فپه‌یمانان ل عیراقێ دكه‌ین بله‌ز میكانیزما هه‌ماهه‌نگیێ دگه‌ل هه‌رێما كوردستانێ كارا بكه‌ن وهێزێن ئاسایش وپێشمه‌رگه دگه‌ل سوپا وده‌زگه‌هـ وهێزێن عیراقى ب پشكداریا هه‌ڤپه‌یمانان لڤێ ده‌ڤه‌رێ پێگڤه كاربكه‌ن. نه‌بونا هه‌ماهه‌نكیێ وهه‌بونا هنده‌ك هێز وگروپێن چه‌كدارى ل ده‌رڤه‌ى فه‌رمان وده‌ستهه‌لاتا حكومه‌تا فیدرال بویه ئه‌گه‌رێ ئالوزیان ل ده‌ڤه‌رێ و وه‌كریه كو گه‌فه‌كا به‌رده‌وام ل سه‌ر هه‌رێما كوردستانێ هه‌بیت . له‌ورا داخواز ژ سه‌روك وه‌زیرێن عیراقێ دكه‌م بله‌ز لیژنه‌كا هه‌ڤپشك بو ڤه‌كولینێ دناڤبه‌را حكومه‌تا فیدرال وحكومه‌تا هه‌رێما كوردستانێ ده‌ست بكاربیت وبزویترین ده‌م هێرشكاران ده‌سته‌سه‌ربكه‌ن وبگه‌هیننه سزایێ خو یێ عادیلانه
نێچیرڤان بارزانى سه‌روكێ هه‌رێما كوردستانێ
شازده‌یى شوباتا دوهزار و بیست وئێكێ
