ئهڤرو نێچیرڤان بارزانى سهروكێ ههرێما كوردستانێ پێشوازى ل سوزوكى كوتارو بالیوزێ ژاپونێ ل عیراقێ كر.
دكومبوونێ دا هاریكاریێن ژاپونێ بو عیراقێ و ههرێما كوردستانێ ب تایبهت ئهو هاریكاریێن برێكا رێكخراوێن نهحكومى یێن ژاپونى پێشكێش كرین و پێشڤهبرنا پهیوهندیێن ههرێما كوردستانێ و عیراقێ دگهل ژاپونێ و دهرفهتێن وهبهرهێنان و سهرمایهداریێ ل ههرێما كوردستانێ و كارتێكرنا كورونایێ و گهفێن تیرورێ و رهوشا نافخو یا ههرێما كوردستانێ و چهند پرسێن دى گهنگهشهكرن.
بالیوزێ ژاپونێ ل عیراقێ ژبلى پهسنا رهوشا ئێمناهیا ههرێما كوردستانێ راگههاند: كو وهلاتێ وان ب گرنگى سهحدكهته پهیوهندیێن دگهل عیراقێ و ههرێما كوردستانێ ، و ههروهسا سوپاسیا ههرێما كوردستانێ كر بو وان هاریكاریێن پێشكێشى ئاژانس و رێكخراوێن نهحكومى یێن ژاپونى كرین و دووپاتكر كو وهلاتێ وان ژ هاریكاریكرنێ بو عیراقێ و ههرێما كوردستانێ دێ یا بهردهوام بیت و لدویڤ بیاڤێن پێدڤى پروژه و كارێن خزمهتگوزارى دێ ئهنجام دهت.
د كومبوونێ دا خاتین ناگایاما یوشیكو بهرپرسا نڤیسینگهها قونسولگخانا ژاپونێ ل ههولێرێ یا ئامادهبوو، رهوشا ئاواره و پهنابهران بهحسكر و ههردوولا ههڤ بوچوون بوون كو ئاواره و پهنابهر لدویڤ حهزا خو ڤهگهرنه جهێن خو.
ل دوماهیێ نێچیرڤان بارزانى ب ههلكهفتا تمام بوونا ئهرك و كارێن وى، سوپاسیا خاتین ناگایاما یوشیكو بهرپرسا نڤیسینگهها قونسولخانا ژاپونێ ل ههولێرێ كر و هیڤیا سهركهفتنێ بو خواست.
