ئه‌ڤرو نێچیرڤان بارزانى سه‌روكێ هه‌رێما كوردستانێ پێشوازى ل شانده‌كێ ئێكه‌تیا زانایێن ئاینێ ئیسلامێ ل كوردستانێ كر . دكومبونه‌كێ دا كو وه‌زیرێ ئه‌وقاف وكاروبارێن ئاینى ئاماده‌ببو رولێ ئێكه‌تیا زانایێن ئاینێ ئیسلامێ د موكمكرنا كلتورێ پێكڤه ژیانێ وته‌بایێ وئێكودوو قه‌بیلكرنێ دناڤبه‌را پێكهاتێن ئاینى ونه‌ته‌وه‌یێن كوردستانێ وهزرا نیشتیمانپه‌روه‌رى وئاین په‌روه‌ریێ بلند هاته سه‌نگاندن. ئێكه‌تیا زانایێن ئاینێ ئیسلامێ پشته‌ڤانیا خو بو بزاڤێن نێچیرڤان بارزانى وسه‌روكاتیا هه‌رێما كوردستانێ ژپێخه‌مه‌ت ئێكرێزى وته‌باییێ دناڤبه‌را لایه‌ن وپێكهاتێن كوردستانێ دوپات كر . وهیڤیا سه‌ركه‌فتنێ بو خواست . د كومبونێ دا به‌حسێ پرسا دستورێ هه‌رێما كوردستانێ هاته‌كرن و دیاركر دستور لسه‌ر بنه‌مایێ وه‌لاتیبون وپه‌یره‌وكرنا ئاینێ ئیسلامى وه‌ك ئێك ژ ژێده‌رێن دارشتن ورێزگرتنێ ل تایبه‌تمه‌ندیا ئاینێن دى وئازادیا وان ب پێدڤى زانى ب ره‌نگه‌كى كو ئاین نه‌بیته بابه‌ته‌كێ سیاسى . نێچیرڤان بارزانى دوپاتكر كو جڤاكێ كوردستانێ جڤاكه‌كێ ئاینى یه . له‌ورا ماموستایێن ئاینى رول وكاریگه‌ریه‌كا مه‌زن لسه‌ر جڤاكى و ئاراسته‌كرنا وێ هه‌یه . ودشێن دڤى بیاڤى دا رولێ خو یێ ئه‌رینى دپێشڤه‌برنا بنه‌مایێن جڤاكى وئاشتیا جڤاكى و ره‌تكرنا توندره‌ویێ بگێرن . هاریكارى وهه‌ماهه‌نگیا دناڤبه‌را وه‌زاره‌تا ئه‌وقاف وكاروبارێن ئاینى وئێكه‌تیا زانایێن ئاینێ ئیسلامى كوردستان وكارێن بوردێ گوتارا ئاینى و ره‌وش وخوشگوزه‌رانیا ماموستایێن ئاینى ل كوردستانێ چه‌ند ته‌وه‌رێن دى یێن كومبونێ بون
