مه‌سرور بارزانى سه‌روكێ حكومه‌تا هه‌رێما كوردستانێ پێشوازى ل عه‌ممار ئه‌لحه‌كیم سه‌روكێ ره‌وتا حیكمه یا نیشتیمانى وهه‌ڤپه‌یمانیا عیراقیون كر.
ددیداره‌كێ دا دانوستاندن سه‌باره‌ت ره‌وشا عیراقێ و په‌یوه‌ندیێن دناڤبه‌را هه‌رێما كوردستانێ و حكومه‌تا فیدرال دا كرن .
سه‌روكێ ره‌وتا حیكمه یا نیشتیمانى وهه‌ڤپه‌یمانیا عیراقیون ئاماژه ب وێ چه‌ندێ دا كو ئه‌و هه‌رێما كوردستانێ ب دوست و هه‌ڤپه‌یمانا خو دزانن و پێدڤى یه دستور ببیته بنه‌مایێ چاره‌سه‌ركرنا كیشێن دناڤبه‌را هه‌رێما كوردستانێ و حكومه‌تا فیدرال دا .
هه‌روه‌سا راگه‌هاند ئه‌م پشته‌ڤانییا رێككه‌فتنا دناڤبه‌را حكومه‌تا هه‌رێمێ و حكومه‌تا فیدرال دا دكه‌ین لسه‌ر بودجه‌یا عیراقێ بو سالا 2021ێ وهیڤیدارین ل جڤاتا نوینه‌رێن عیراقێ ده‌نگ لسه‌ر بهێته دان .
سه‌روكێ حكومه‌تا هه‌رێما كوردستانێ دووپاتى ل وێ چه‌ندێ كر كو هه‌رێما كوردستانێ هه‌رده‌م دگه‌ل چاره‌سه‌ركرنا بنه‌ره‌تى یا كێشان بوویه دگه‌ل حكومه‌تا فیدرال لسه‌ر بنه‌مایێ دستورى و دابینكرنا ماف و شایسته‌یێن دارایى یێن هه‌رێما كوردستانێ و پاراستنا تایبه‌تمه‌ندی و قه‌وارێ فیدرالی یێ هه‌رێما كوردستانێ و لبه‌رچاڤگرتنا پره‌نسیپێن هه‌ڤسه‌نگى وشه‌راكه‌ت وسازانێ.
