رێبه‌ر ئه‌حمه‌د وه‌زیرێ ناڤخۆیێ حكومه‌تا هه‌رێما كوردستانێ د كۆنفرانسه‌كێ رۆژنامه‌ڤانی دا ئه‌نجامێ كۆمبوونا خۆ ل گه‌ل لیژنا ناڤخۆیا په‌رله‌مانێ كوردستانێ ئاشكرا كر و راگه‌هاند، هه‌ر چه‌نده په‌كه‌كێ موله‌تا كاركرنێ ژ حكومه‌تا هه‌رێما كوردستانێ نینه، لێ ل ده‌ڤه‌رێن سنورى و د كویراتیا ئاخا هه‌رێما كوردستانێ دا پێشیلكارییان دكه‌ن، ئه‌وا ل به‌رامبه‌ر پێشمه‌رگه‌یان ژى هاتییه كرن، جهێ قه‌بویلكرنێ نینه.
د پرێسكۆنفراسێ دا وه‌زیرێ ناڤخۆ گۆت ژى، ژ بۆ راستڤه‌كرنا قانونا ژماره 16 یا سالا 1993 كو تایبه‌ته ب هه‌لگرتنا چه‌كى، لیژنه‌یه‌ك هاتییه پێكئینان تاكو ل گه‌ل ره‌وشا نوكه بگونجیت، هه‌روه‌سا راستڤه‌كرنا قانونا ژماره 18ی یا سالا 2011 كو تایبه‌ته ب خانه‌نشینیێ وان پرۆژه‌یه‌ك ئاماده‌كریه كو تایبه‌ته ب هێزێن ئاسایشا ناڤخۆ و گه‌نگه‌شه ل سه‌ر هاتیه كرن، ئه‌و پرۆژه دێ ل گه‌ل وه‌زاره‌تا دارایی و وه‌زاره‌تێن په‌یوه‌ندیدار هێته گه‌نگه‌شه‌كرن.
ل دۆر رێكخستنا یه‌كه‌یێن هێزێن پێشمه‌رگه‌ى دگه‌ل میلاكێ وه‌زاره‌تا پێشمه‌رگه‌یى راگه‌هاند: پارتى یه‌كه‌یا 80ێ ئێخستیه ژێر سه‌رپه‌رشتیا وه‌زاره‌تا پێشمه‌رگه‌ى، و هیڤیى دكه‌ین برایێن مه ژ ئێكه‌تى نشتیمانى كوردستان ژى ئه‌وێ بریارێ بده‌ن و یه‌كه‌یا 70ێ ژى بهێته دناڤ وه‌زاره‌تا پێشمه‌رگه‌ى دا، هه‌روه‌سا لدور رێكخستنا یه‌كه‌پپێن پاسه‌وانى یێن سه‌ر ب وه‌زاره‌تا نافخو ڤه رێبه‌ر ئه‌حمه‌د وه‌زیرێ ناڤخویێ هه‌رێمێ راگه‌هاند رێنما ل جڤاتا وه‌زیران ده‌ركه‌فتینه بو رێكخستنا یه‌كه‌یێن پاسه‌وانى و چه‌ندین كار لسه‌ر هاتیه‌كرن و ل نێزیك لدویڤ رێنمایا یه‌كه‌یێن پاسه‌وانى ژى دێ هێنه رێكخستن
ل دۆر هێرشێن په‌كه‌كێ بۆ سه‌ر پێشمه‌رگه‌ى رێبه‌ر ئه‌حمه‌د ئاماژه ب هندێ كر، ئه‌و ئیدانه‌یا وێ ره‌فتارێ دكه‌ن، هه‌رچه‌نده په‌كه‌كێ موله‌تا كاركرنێ ژ حكومه‌تا هه‌رێما كوردستانێ نینه، لێ ل ده‌ڤه‌رێن سنورى و د كویراتیا ئاخا كوردستانێ دا چالاكیان دكه‌ت، ئه‌وا ل به‌رامبه‌ر هێزێن پێشمه‌رگه‌ى هاتییه كرن جهێ قه‌بویلكرنێ نینه، و مافێ پێشمه‌رگه‌یه ل هه‌مى جهێن هه‌رێما كوردستانێ لڤینان بكه‌ت.
