هاریكارێ سه‌رۆكێ حكومه‌تا هه‌رێما كوردستانێ بۆ كاروبارێن ئابورى راگه‌هاند: حه‌فتیا بهێت شانده‌كێ حكومه‌تا هه‌رێمێ دێ سه‌ره‌دانا به‌غدایێ كه‌ت، گۆت ژى دابه‌شكرنا مووچه‌یێ فه‌رمانبه‌ران و برێ لێبرینێ گرێداى داهاتێ حكومه‌تێ یه.
رێباز حه‌ملان هاریكارێ سه‌رۆكێ حكومه‌تا هه‌رێما كوردستانێ بۆ كاروبارێن ئابورى گۆت، د پلان دایه حه‌فتیا بهێت شاندێ حكومه‌تا هه‌رێمێ بچیته به‌غدایێ، مه‌ره‌ما سه‌ردانێ ژى گۆتوبێژكرنا میكانیزكا بجهئینانا بۆدجه‌یا ئیراقێ یا سالا 2021ـیه. ب تایبه‌تى ئه‌و پشكا كو په‌یوه‌ندى ب ماف و ئیمتیازاتێن هه‌رێمێ ڤه هه‌یه داكو وه‌كو خو بهێته بجهئینان.
ل دۆر مووچه‌یێ هه‌یڤا بهێت، ناڤهاتى دیاركر، پێشتر وان ئاماژه پێكربوو دابه‌شكرنا مووچه‌ى ب لێبرین ب تنێ خۆ گونجاندنه ل گه‌ل ئه‌و داهاتێ كو ل به‌ر ده‌ستێ حكومه‌تا هه‌رێمێ یه ئه‌و ژى ژ داهاتێ نه‌فتێ و ده‌روازه‌یێن سنورى، گومرك، باج و رسوماتان پێك دهێت. ئه‌گه‌ر بۆدجه‌یا ئیراقێ بچیته د وارێ ب جهئینانێ دا، بێگومان لێبرینا مووچه‌ى نامینیت، یان دێ بڕێ لێبرینێ گه‌له‌ك كێمتر بیت.
ده‌رباره‌ى پرۆژه قانوونا بۆدجه‌یا هه‌رێما كوردستانێ ژى، رێباز حه‌ملان ئاماژه ب هندێ كر، پرۆژه قانوونا بۆدجه‌ى ژلایێ وه‌زاره‌تا دارایی و وه‌زاره‌تا پلاندانانێ ڤه هاتیه ئاماده‌كرن و چه‌ند جاره‌كان ژى ره‌وانه‌ى جڤاتا وه‌زیران هاتیه كرن، لێ هنده‌ك كێم و كاسی تێدابوون له‌ورا بۆ وه‌زاره‌تا دارایی دهاته ڤه‌گه‌راندن، د كۆمبوونا بهێت دێ ئه‌و پرۆژه قانوون دێ بۆ جڤاتا وه‌زیرێن هه‌رێمێ هێته هنارتن و پاشان دێ ره‌وانه‌ى په‌رله‌مانێ كوردستانێ هێته كرن.
