ئه‌ڤرو درێ و ره‌سمه‌كى دا، رووفاتێن 104 كه‌سێن قوربانیێن گوندێ كوجو پشتى ل نوشداریا داد ل به‌غدا ژلایێ كه‌س و كارێن وان ڤه گه‌هاندنه گوندێ ناڤبرى ل وێرێ هاتنه ڤه‌شارتن.
د رێ و ره‌سمێن ڤه‌شارتنا رووفاتانێن وان 104 قوربانیێن گوندێ كوجو دا، گوتارێن هه‌ر ئێك ژ سه‌روكێ هه‌رێما كوردستانێ و سه‌روكێ حكومه‌تێ هه‌رێما كوردستانێ و سه‌روك وه‌زیرێن عیراقێ هاتنه پێشكێشكرن.
ل ده‌ستپێكێ نه‌وزاد هادى نوینه‌رێ سه‌روكێ هه‌رێما كوردستانێ راگه‌هاند كو كوردێن ئێزدى لسه‌ر جوداهیا ئاینى هاتنه كوم كوژكرن وگوت: كومكوژیا گوندێ كوجو بو مه رویدانه‌كا خه‌مبار و دلته‌زین بوو.
نه‌وازد هادى به‌حسێ وێ چه‌ندێ ژى كر كو ئه‌وا به‌رامبه‌ر كوردێن ئێزدی ژلایێ تیرورستێن داعش ڤه هاتیه ئه‌نجامدان، ئارمانج لێ تێكدانا پێكڤه‌ژیانێ بوو وگوت: بزاڤێن خو دێ ب وى ره‌نگێ بكارئینین كو كوردێن ئێزدى دپاراستى بن.
نوینه‌رێ سه‌روكێ هه‌رێما كوردستانێ گوت ژى: دێ رێگریێ ل دووباره بوونا كوم كوژیا كوردێن ئێزدى كه‌ین.
ژلایێ خوڤه دیندار زێبارى نوینه‌رێ سه‌روكێ حكومه‌تا هه‌رێما كوردستانێ ئاماژه ب وێ چه‌ندێ دا كو گه‌له‌ك به‌لگه لسه‌ر كومكوژیا كوردێن ئێزدى پێشكێشى ناڤه‌ندیێن ده‌وله‌تى كرینه.
دیندار زێبارى گوت ژى كو ژماره‌كا مه‌زن یا پێشمه‌رگه‌ى ل شه‌رێ دژى داعش دا شه‌هید و بریندار بوون و گوت: دێ رێگریێ ل كومكوژیا كوردێن ئێزدى كه‌ین.
نوینه‌رێ سه‌روكێ حكومه‌تا هه‌رێما كوردستانێ راگه‌هاند ژى: پێدڤیه رێك بهێنه خوشكرن دا ئاوارێن شنگالێ بزڤرنه سه‌ر جهێن خو و گوت: نابیت رێگریێن سیاسى به‌رامبه‌ر ئیدارا شنگالێ بمینن.
