دكتور جوتیار عادل ئاخفتنكه‌رێ حكومه‌تا هه‌رێما كوردستانێ پشتى بدوماهیك هاتنا كومبوونا جڤاتا وه‌زیرێن هه‌رێما كوردستانێ دكونگره‌كێ روژنامه‌ڤانى دا راگه‌هاند: دوهى جڤاتا وه‌زیرێن عیراقێ بریاردا هه‌یڤانه 200 ملیار دیناران بو هه‌رێما كوردستانێ بهنێریت و كوژمێ وێ پاره‌ى ژى كو لسه‌ر رێكه‌فتین و لدویڤ وێ بریارا هاتیه دان بو هنارتنا پاره‌ى بو هه‌رێمێ پارێ هه‌یڤا ئێك یا ئه‌ڤ ساله حه‌تا هه‌یڤا حوزه‌یرانێ دێ هێته هنارتن.
جوتیار عادل گوت ژى: د كومبوونا ئه‌ڤرو یا جڤاتا وه‌زیران دا و ژ پێخه‌مه‌ت باشتر برێڤه‌برنا كاروبارێن وه‌لاتیان و نه‌هێلانا روتینێ، بریار هاته‌دان ده‌واما فه‌رمانگه‌هان بهێته ئاسایى كرن و ئێدى ده‌وامكرنا فه‌رمانبه‌ران ب شێوازێ ته‌ناوب نه‌مینیت، و ده‌وام ل فه‌رمانگه‌هێن حكومه‌تێ دێ وه‌كى خو لێ هێت.
سه‌باره‌ت گرانبوونا بهایێ پانزینێ ژى جوتیار عادل ئاخفتنكه‌رێ حكومه‌تا هه‌رێما كوردستانێ راگه‌هاند: حكومه‌تا هه‌رێمێ بزاڤێ دكه‌ت بهایێ په‌نزینێ كێم بكه‌ت و بهایێ په‌نزینێ بهێته بنه‌جهكرن.
سه‌باره‌ت به‌لاڤكرنا مووچێ فه‌رمانبه‌ران دكتور جوتیار عادل راگه‌هاند: حكومه‌تا هه‌رێمێ یا پێگیره ب به‌لاڤكرنا مووچه‌ى هه‌ر 30 روژان جاره‌كێ، ئاماژه ب وێ چه‌ندێ ژى كر هیڤیدارین د ده‌مه‌كێ نێزیك دا مووچێ فه‌رمانبه‌ران بێ لێبرین بهێته به‌لاڤكرن و حكومه‌تا هه‌رێما كوردستانێ به‌رده‌وام دگه‌ل وێ چه‌ندێ دایه بشێت 100% مووچه‌ى بده‌ت.
