ئه‌ڤرو ب چاڤدێرییا دكتورعلى ته‌ته‌ر پارێزگارێ دهۆكێ و ب ئاماده‌بوونا رێڤه‌به‌رێ گشتى یێ ئه‌وقافێ و سه‌روكێ لقێ دهۆك یێ ئێكه‌تییا زانایان و چه‌ند به‌رپرسێن حزبى و ئیدارى، مزگه‌فتا ره‌یان ل تاخێ ئێتیتێ ل روژهه‌لاتێ باژێرێ دهۆكێ هاته ڤه‌كرن .
درێ ورسمێن ڤه‌كرنا مزگه‌فتێ دا لبه‌راهیێ مه‌لا ته‌ها چه‌ند ئایه‌تێن قورئانا پیروز خاندن.
لدویڤدا مه‌لا رێبه‌ر رێڤه‌به‌رێ ئه‌وقافا دهوكى په‌یڤه‌ك پێشكێشكر و بخێر هاتنا مێهڤانان كر و ده‌ستخوشى ل وان هه‌می خێرخازا كر یێن مزگه‌فت ئاڤاكرى.
لدویڤدا محمد خالد محمد رێڤه‌به‌رێ گشتى یێ ئه‌وقافێ د په‌یڤه‌كێدا سوپاسیا وان خێرخازا كر یێن كو مزگه‌فت ئاڤاكرى و داخواز كر كو مزگه‌فت ببیته مینبه‌رێ گه‌هاندنا په‌یاما خودێ و پێغه‌مبه‌را و گه‌هاندنا په‌یاما پێكڤه ژیانێ و هه‌ڤدوو قه‌بولكرنێ .
پارێزگارێ دهۆكێ د گوتاره‌كێدا ده‌ستخوشى ل وان خێرخازا كر یێن مزگه‌فت ئاڤاكرى و خواست كو نمونێن وه‌كی وان پتر هه‌بن بو ئاڤاكرنا مزگه‌فتا و قوتابخانا و رێك و بانا و پرۆژێن دى یێن خزمه‌تگوزارى.
هه‌روه‌سا ته‌كه‌زى ل سه‌ر ئاڤاكرنا مزگه‌فتا ب ره‌نگه‌كێ ئه‌ندازیارى یێ كوردستانى و ب كوالیتیه‌كا باش كر كو هه‌ژى په‌رستنا خودێ بیت.
پارێزگارێ دهۆكێ ئه‌و چه‌نده ژى دیاركر كو دوژمنێن ملله‌تێ مه چ جوداهى نه‌كرییه هه‌مبه‌ر خرابكرنا گوند و مزگه‌فتێن كوردستانێ و ل سالێن هه‌شتێیان پتری 2753 مزگه‌فت هاتینه خرابكرن لێ پشتى سه‌رهلدانا 1991 و دامه‌زراندنا حكومه‌تا هه‌رێمێ و ب هاریكاریا خێرخازا پێنچ هه‌تا شه‌ش هزار مزگه‌فت هاتینه ئاڤاكرن.
ل دویماهیێ گوت : بلا مزگه‌فت ببنه جهێ په‌رستنا خودێ وبه‌لاڤكرنا گیانێ لێبورین وپێكڤه ژیانێ وهه‌رده‌م پاقژ بهێنه راگرتن ورێنمایێن خو پارێزیێ ژنه‌خوشیا كورنایێ بهێنه بجهئینان .
هه‌ژى گوتنێ یه مزگه‌فتا ناڤبرى ل سه‌ر روبه‌رێ (1343) مترێن دووجاركى ژلایێ خێرخازان ( دكتور اسماعیل محمد – حجى صدیق كوڤلى – حجى جمیل سپیندارى – حجى جمیل ئێتیتى ) هاتیه ئاڤاكرن .
