بەرپرسێ پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر کو د سالا ٢٠٢٠ ێ دا سەرۆکاتیا باژێرڤانیا دھۆکێ ٣٢ پرۆژێن جوراوجور ب کوژمێ ٥٢ ملیار و ٨٣ ملیۆن دیناران ل باژێرێ دھۆکێ ئەنجامداینە و گۆت: “د ئەڤ سالە دا ٨٧٧ مۆلەتێن جوراوجۆر ل باژێرێ دھۆکێ بۆ ئاڤاکرنا پرۆژێن بازرگانی و خزمەتگۆزاری و نیشتەجێ و پیشەسازی ھاتینەدان”.
ئیسماعیل مستەفا، بەرپرسێ پەیوەندی و راگەھاندنێ ل سەرۆکاتیا باژێرڤانیا دھۆکێ ئەڤرۆ رۆژا ٢٩/١٢/٢٠٢٠ د کۆنگرەکێ رۆژنامەڤانی دا ئاشکرا کر کو د ئەڤ سالە دا سەرۆکاتیا باژێرڤانیا دھۆکێ چەندین پرۆژە و کاروچالاکیێن جودا ژ پێخەمەت خزمەتکرنا وەلاتیان ئەنجامداینە ژ وان پرۆژێن د سالا ٢٠٢٠ دا ھاتینە ئەنجامدان جاددێن باژێرێ دھۆکێ ب درێژاھیا ٢٩ ھزار و ٥٥٥ م٢ ھاتینە ڤەکرن و راستکرن و شەش ھزار و ٤٢٠م٣ یێن جادان ھاتینە بڕین و دھەمان دەم دا ب درێژاھیا سێ ھزار مەترێن سێجا جاددێن باژێرێ دھۆکێ ھاتینە داگرتن و گۆت: “د ھەمان سال دا چەندین کارێن دی وەکو قێرکرن و زفتکرنا جاددان و دانانا کربستونێ رەخ و نیڤێن جاددان و کارێن کونکریتکرن و ئاڤرێژان و دیوارێن پالپشت و دروستکرنا باخچان و کێشانا تورێن ئاڤدانێ ھاتینە ئەنجامدان”.
ناڤھاتی ئاماژە دا وێ چەندێ کو د ١٢ ھەیڤێن بۆری دا ٣٣٠ ھزار گۆلێن وەرزی ل باژێرێ دھۆکێ ھاتینە چاندن و و ھزار و ٣٠٠ کگم فریزەی ھاتینە چاندن و گۆت: “د ھەمان دەم دا ١٧٠ ھزار و ١٩٠ تەنێن بەرمایکان (گلێش) ل باژێرێ دھۆکێ ھاتینە ھاڤێتن، ھەروەسا شەش ژوور ١٦٧ پەرژان و ٩٦ بیستان و ٥٠ باخچە کو ب شێوەیێ زێدەگاڤی ھاتبوونە ئاڤاکرن ھاتینە خرابکرن و ٧٩ کەپر ژی ھاتینە راکرن”.
بەرپرسێ پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر کو پرۆژێ چێکرنا ئەندەرپاسا جاددا بارزان ل نێزیک مزگەفتا شەھیدان د قوناغا جێبەجێکرنێ دایە و ھەتا نوکە ب رێژا ٨٢% کار د چێکرنا پرۆژەیی دا ب دووماھی ھاتیە و ل دەمەکێ نێزیک پرۆژە دێ ب دووماھی ھێت و گۆت: ” د ئەڤ سالە دا ٨٧٧ مۆلەتێن جوراوجۆر ل باژێرێ دھۆکێ بۆ ئاڤاکرنا پرۆژێن بازرگانی و خزمەتگۆزاری و نیشتەجێ و پیشەسازی ھاتینەدان، ھەروەسا ٦٦ ب جھێن سەرپێچی کرین وەکو کافێ و خوارنگەە و دکان ھاتینە ئاگەھدارکرن و ٢٤٤ شۆفێرێن بەرمایک ھاڤێتینە دەوروبەرێن سکرێ دھۆکێ ھاتینە سزادان”.
ل دووماھیێ ئیسماعیلی ئاشکرا کر کو ھەر ژ دەستپێکا ئەڤ سالە ھەتا دوھی رۆژا ٢٨/١٢/٢٠٢٠ێ ھزار و ٢١٣ کەس کو ٥١٥ کەس رەگەزێ مێ و ٦٩٨ کەس رەگەزێ نێر ل گۆرستانا شاخکێ ل باژێرێ دھۆکێ ھاتینە ڤەشارتن.
