جڤاتا پارێزگەھا دھۆکێ ئەڤرۆ کۆمبوونا خو یا ئاسایی یا ژمارە 118 لدۆر پەسەندکرنا بەربژێرێن باژێرڤانیێن پارێزگەھا دھۆکێ ئەنجام دا و تێدا 48 بەربژێر ھاتنە پەسەندکرن.
فەھیم عەبدوللا حەمۆ، سەرۆکێ جڤاتا پارێزگەھا دھۆکێ د پرێس کۆنفرانسەکی دا ئاشکرا کر کو پشتی چەندین جاران پرۆژێ بەربژێرێن باژێرڤانیان ژلایێ جڤاتا پارێزگەھا دھۆکێ ڤە ژ بەر تێبینی و پێشنیارێن ئەندامێن جڤاتێ ھاتیە زڤراندن، ئەڤرۆ ب پتریا دەنگێن ئەندامێن جڤاتا پارێزگەھا دھۆکێ پشتی ئەو ھەمی تێبینی ژلایێ رێڤەبەرێ گشتی یێ باژێرڤانیان ل پارێزگەھا دھۆکێ و ستافێ وی ڤە ھاتینە چارەسەرکرن 48 بەربژێرێن جڤاتا باژێرڤانیێن دھۆکێ ھاتنە پەسەندکرن.
ناڤبرى ئاماژە دا وێ چەندێ کو د کۆمبوونا ئەڤرۆ دا ژمارەکا ئەندامێن جڤاتا پارێزگەھا دھۆکێ پێشنیارەک لسەر وێ چەندێ کربوو کو دان و ستاندن لدۆر دووبارە ڤەکرنا ھۆلێن تازیا ل پارێزگەھا دھۆکێ بھێتەکرن، بەلێ ئەڤ بابەتە یێ گرێدایی لیژنا بلند یا بەرھەنگاربوونا ڤایرۆسێ کۆرۆنایێ یە ل پارێزگەھا دھۆکێ و دڤێت ئەو بڕیارێ ل دۆر ڤێ چەندێ بدەن، ژ بەر کو بڕیارا دائێخستنا ھۆلێن تازیان ھەر ژلایێ لیژنا ناڤبرى ڤە ھاتبوو دان.
