ئهڤرو جڤاتا وهزیرێن ههرێما كوردستانێ ب سهرپهرشتیا مهسرور بارزانى سهروكێ حكومهتا ههرێما كوردستانێ كومبوو.
ل دهستپێكا كومبوونێ سهروكێ جڤاتا وهزیران پیروزباهى ل كوردستانیان كر ب ههلكهفتا روژا جل و بهرگێن نهتهوهیى كو چهند سالن وهلاتیێن ههرێما كوردستانێ ل روژا 10ێ ئادارێ ب رێ و رهسمێن جودا رێزێ ل جل و بهرگێن نهتهوهیێن خو دگرن.
سهروكێ حكومهتێ ئاماژه ب سهرهدانا قهداسهتا پاپاى كر و ب سهرهدانهكا گرنگ و دیروكى بناڤكر و گوت: ئهڤێ سهرهدانێ دووپاتكر كو ههرێما كوردستانێ مهلبهندهكێ گرنگ یێ پێكڤهژیانا ئاشتیانهیه ل دهڤهرێ.
دهستخوشى ژى ل رێكخهر و دهزگههێن پهیوهندیدارێن حكومهتا ههرێما كوردستانێ و بتایبهتى هێزێن ئهمنى كر بو سهرئێخستنا سهرهدانێ كو ب سهركهفتیانه د سهقایهكێ ئارام دا برێڤهچوو.
لدویڤدا ههر ئێك ژ پشتیوان سادق وهزیرێ ئهوقاف و كاروبارێن ئاینى و سهفین دزهیى سهروكێ فهرمانگهها پهیوهندیێن دهرڤه راپورتێن خو سهبارهت سهرهدانا قهداسهتا پاپاى و گرنگیا سهرهدانێ و دهرئهنجامێن وێ بو ههرێما كوردستانێ بهحسكرن.
د برگهیهكا دى یا كومبوونێ دا ئارام محهمهد قادر وهزیرێ خاندنا بلند و ڤهكولینێن زانستى دوماهیك رهشنڤیسا پروژێ پێشڤهبرنا مولهتا خاندنێ ل ههرێما كوردستانێ بهحسكر، پشتى گهنگهشهكرن و لێكگوهارتنا بیروبووچونا و پێشنیاركرنا چهند تێبینى و راستڤهكرنا پروژه پهسهندكر.